Inzego z’ubutasi z’u Burundi biravugwa ko zataye muri yombi Félix Mweza, umwe mu bakozi b’ambasade ya Repubulika Iharanira Demokarasi ya Congo (RDC) i Bujumbura azira gukora n’umutwe wa M23 .
Ibi kandi bibaye nyuma y’amasaha make Laurent Ruboneka Musabwa, undi mukozi w’iyo ambasade akaba n’umuyobozi w’ishyirahamwe ry’Abanyamulenge, nawe byemejwe ko yamaze gufungwa ku itariki ya 27 Nyakanga.
Aba bombi, nk’uko amakuru yemeza, bahise boherezwa muri Congo Kinshasa n’indege yihariye yateguwe na Leta, aho bari gukorwaho iperereza n’Urwego rw’Igihugu rushinzwe Ubutasi (ANR) hamwe n’ishami rya gisirikare rishinzwe ibikorwa by’ubugambanyi (DEMIAP).
Ibi bibaye mu gihe Ambasaderi wa Kongo Kinshasa i Bujumbura, Willy Mulumba, nawe yahamagajwe i Kinshasa ku wa 30 Nyakanga ngo atange ibisobanuro ku mikorere y’abo bakozi be.
Amakuru yizewe yemeza ko ubwo aba badipolomate basabaga gusubira ku kazi kabo i Bujumbura, guverinoma ya Congo yanze, ibasaba kuguma i Kinshasa mu gihe iperereza bagikorwaho rigikomeje.
Nubwo hatarashyirwa hanze itangazo rya Leta rihamya ko Mulumba ari mu bakekwaho kugira aho bahurira n’ihuriro rya AFC (Alliance Fleuve Congo)—rishyigikiwe n’umutwe wa M23 n’indi mitwe irimo MRDP-Twirwaneho, hari byinshi byerekana ko na we ashobora gukorwaho iperereza ryimbitse kuri iki kirego .
Mweza, ukomoka mu bwoko bw’Abashi bwo mu Ntara ya Kivu y’Epfo, ari mu bagarutsweho cyane mu iperereza. Aho yakunze kwegeranywa n’andi mazina akomeye nka Bertrand Bisimwa uyoboye M23 mu bya politiki, na Marcellin Cishambo wahoze ari Guverineri wa Kivu y’Epfo, bombi bamaze kugaragara mu buyobozi bukuru bwa AFC/M23.
Ruboneka, umunyamabanga wa Mutuelle Shikama y’Abanyamulenge n’umuyobozi w’ishyirahamwe ry’abarokotse ubwicanyi bw’i Gatumba bwo mu 2004, nawe yafashwe mu buryo butunguranye, maze yoherezwa i Kinshasa.
Iyi dosiye yaje mu gihe aka karere karimo ubushyamirane bwa politike bukabije: u Burundi bikekwa ko bufite ingabo 10,000 muri RDC ziri kurwana ku ruhande rwa FARDC na Wazalendo, barwanya umutwe w’inyeshyamba wa AFC/M23.
Ibi bikorwa bigendana n’ibirego bya RDC na u Burundi bishinja u Rwanda nk’umuterankunga w’iyo mitwe, ibyo u Rwanda rwamagana, rukavuga ko ahubwo aribo bafasha umutwe wa FDLR ushinjwa kugira uruhare rukomeye muri jenoside yakorewe Abatutsi yo mu 1994.
