Ikipe ya FC Saint Eloi Lupopo yo muri Repubulika ya Demokarasi ya Congo yatangaje ko yamaze guhabwa inshingano Guy Bukasa zo kuyitoza guhera mu mwaka w’imikino 2025-2026.
Uyu mwanzuro ukubiye mu itangazo ryatangajwe ku cyumweru tariki ya 17 Kanama 2025, i Lubumbashi mu ntara ya Haut-Katanga.
Bukasa, ufite Licence A yemewe na CAF yahawe muri uyu mwaka 2025, azatoza iyi kipe mu marushanwa abiri akomeye arimo CAF Champions League n’irushanwa rya shampiyona y’imbere mu gihugu, Ligue 1.
Ni intambwe ikomeye ku mutoza umaze imyaka myinshi agaragaza ubunyamwuga mu gukoresha abakinnyi no gushyira ku murongo amakipe yanyuzemo arimo na Rayon Sports na Gasogi United zo mu Rwanda.
Ubuyobozi bwa FC Saint Eloi Lupopo bwatangaje ko bwahisemo Bukasa kubera uburyo azi gutoza neza, imyitwarire myiza ndetse n’ukuntu ategura ikipe mu buryo bwihariye.
Mu itangazo ryatanzwe n’iyi kipe, bagize Bati: “Twashingiye ku bunararibonye afite mu bihugu bitandukanye, harimo RDC, u Rwanda ndetse na Tunisia. Perezida w’iyi kipe hamwe n’ubuyobozi bwose bwemeje ishyirwaho rye.”
Guy Bukasa afite amateka akomeye mu mupira w’amaguru, aho yabaye umutoza wungirije w’amakipe menshi y’igihugu muri RDC. Yabaye umutoza wungirije mu ikipe y’igihugu y’abatarengeje imyaka 17 (2016–2018), anakorana na Raul Shungu mu ikipe y’igihugu y’abatarengeje imyaka 23, ndetse anakorana na Otis Ngoma mu ikipe ya CHAN.
Mu mwaka 2019, Bukasa yagizwe umutoza mukuru w’ikipe y’igihugu ya Kongo y’abatarengeje imyaka 20. Yegukanye igikombe cya UNIFAC mu 2024 i Brazzaville, bituma ikipe ayoboye ibona itike yo gukina igikombe cya Afurika cy’abatarengeje imyaka 20, aho yagejeje ikipe muri 1/4 cy’iryo rushanwa.
IZINDI NKURU WASOMA
