Umutoza ukomoka mu gihugu cy’Ubuholandi, Erik ten Hag, ashobora kwirukanwa nyuma yo kubura intsinzi mu mikino ibiri ifungura ya shampiyona y’icyiciro cya mbere mu gihugu cy’Ubudage.
Nk’uko ikinyamakuru Kicker cyo mu Budage kibivuga, Ten Hag ari hafi gusezererwa ndetse ikipe ntabwo iri gushimishwa na busa n’imyitwarire ye.
Uyu mugabo watoje Manchester United na yo yavuyemo mu buryo butari bwiza nyuma y’umusaruro utari mwiza yagize nubwo uwamusimbuye, Ruben Amorim, nawe bikomeje kumugora.
Ten Hag muri uyu mwaka w’imikino amaze gutoza imikino ibiri nta numwe arabasha gutsinda. Umukino wo mu mpera z’iki cyumweru Bayer 04 Leverkusen yanganyije na Werder ibitego bitatu kuri bitatu(3-3).
Ten Hag yasimbuye Xabi Alonso wahoze akinira Liverpool, Real Madrid na Bayern Munich, wari wakoze amateka akomeye muri Leverkusen yo kuyihesha igikombe cya shampiyona ku nshuro yayo ya mbere.
Alonso yegukanye iyi shampiyona idatsinzwe ndetse ibasha no kugera ku mukino wa nyuma wa Europa League batsinzwemo na Atalanta yo mu Butaliyani mu mwaka 2024.
Ten Hag yasinye muri Leverkusen muri Gicurasi nyuma y’amezi arindwi nta kazi afite, akaba yaramenyekanye cyane atoza ikipe ya Ajax y’iwabo.
IZINDI NKURU WASOMA
Umukino wa APR FC muri CECAFA wasubitswe!
Rayon Sports yongereye imbaraga mu busatirizi bwayo !
