Ikigo cy’igihugu gishinzwe imisoro n’amahoro, [RRA], cyatangaje ko kiri mu myiteguro yo gutangira gusoresha serivisi za digitali zirimo Airbnb na Netflix, aho ishyirwa mu bikorwa ry’iyo misoro riteganyijwe gutangira mu ngengo y’imara y’umwaka utaha wa 2026.
Nk’uko bitangazwa na Jean-Paulin Uwitonze, Umuyobozi wungirije ushinzwe serivisi z’abasora n’itumanaho muri RRA, Airbnb izajya isorerwa mu byiciro bibiri: nk’uruhererekane rw’ubukerarugendo ndetse nk’urubuga rwa digitali. Naho Netflix, kimwe na Amazon, izajya isorerwa nk’urubuga rwihariye rwa digitali.
Uwitonze yagize ati: “Ibyiza ni uko guhera mu ngengo y’imari ya 2026, tuzatangira gusoresha izi serivisi za digitali. Tuzasoresha Airbnb, Netflix, Amazon n’izindi, hashingiwe aho ayo mafaranga akomoka.”
Mu gihe iyo misoro ya serivisi za digitali izatangira gukusanywa umwaka utaha, RRA yatangiye gukusanya umusoro w’ubukerarugendo kuva tariki ya 1 Nyakanga 2025, nyuma y’uko watangajwe muri Mata.
Uwo musoro ungana na 3% y’amafaranga yishyurwa ku icumbi (utarama gusorwaho TVA), ukaba ucibwa ku mahoteli, amacumbi yigenga, moteli, na serivisi za Airbnb zanditse mu gihugu.
RRA yatangaje ko ubwitabire mu kwezi kwa mbere bwari “buhagaze neza”, aho amafaranga ya mbere yakiriwe tariki ya 15 Kanama.
Gusa, ikigo cyavuze ko gusoresha Airbnb bigoye kuko ikorera hanze y’u Rwanda, bityo hakenewe ibikoresho byihariye byo gukusanya imisoro ya digitali.
Uwitonze yavuze ko buri bucuruzi bukusanya uwo musoro buri kwezi, bukawutanga bitarenze ku itariki ya 15 y’ukwezi gukurikiyeho. Yongeyeho ko RRA ikorana n’inzego zitandukanye mu kumenya abacuruzi bakora mu buryo butemewe n’amategeko.
Ati : “Abagerageza gukwepa gusora barafatwa bagahanwa. Dukoresha amakuru y’abaguzi, ndetse na EBM (Electronic Billing Machine) mu kugenzura imisoro,” .
IZINDI NKURU WASOMA
Indonesia : Kajugujugu yarimo abantu umunani yaburiwe irengero
