Ishami ry’Umuryango w’Abibumbye ryita ku Buzima (OMS) ryatangaje ko ryatangiye gutanga inkingo za Ebola mu Ntara ya Kasai, imwe mu zugarijwe n’icyorezo muri Repubulika Iharanira Demokarasi ya Congo.
Inkingo zatanzwe zirimo guhabwa abantu bafite ibyago byinshi byo kwandura, barimo abaganga, n’abahuye n’abarwaye.
Doze 400 za mbere z’inkingo za Ervebo, OMS yatangaje ko zamaze kugezwa i Bulape, agace kabanje kwibasirwa n’iki cyorezo. Izi nkingo zaturutse mu bubiko bw’igihugu, aho habarurwa ko habitse doze zigera ku 2,000.
Ishyirahamwe mpuzamahanga rishinzwe gutanga inkingo ryemeje ko rizaha DRC inkunga ya doze 45,000 z’inkingo za Ebola. Iyi nkunga izifashishwa mu guhangana n’ikwirakwira ry’iyi virusi, yongera guca ibintu kuva mu ntangiriro za Nzeri uyu mwaka.
Bimwe mu bimenyetso bya Ebola birimo umuriro mwinshi, kubabara ingingo, impiswi no kuva mu myenge yose ku mubiri. Iyi virusi ishobora kumara igihe mu mubiri w’uwanduye, ikazongera kumugarukamo igihe runaka.
Nk’uko byatangajwe na Minisiteri y’Ubuzima ya RDC, abantu 32 bakekwaho ubwandu, 20 bamaze kwemezwa ko banduye naho 16 bamaze kwitaba Imana.
Dr. Patrick Otim, uhagarariye OMS muri RDC, yavuze ko “Guhagarika iki cyorezo bishoboka, ariko bizasaba ko hafatwa ingamba zihuse kandi zifatika.”
Ibi yabivugiye mu nama yaberaga mu Busuwisi, aho yasabye ubufasha bwihuse, haba ku rwego rw’igihugu ndetse no ku bafatanyabikorwa mpuzamahanga.
IZINDI NKURU WASOMA
CECAFA yemeye imikorere yayo mibi imbere ya APR FC
Urubanza rwa Bishop Gafaranga rwashyizwe mu muhezo
