Hatowe umuyobozi mushya w’Ijabo Ryawe Rwanda icyizere cya ruhago y’u Rwanda

kuri uyu  wa Gatanu, tariki ya 11 Ukwakira 2025,  muri Hilltop Hotel habereye Inteko Rusange idasanzwe y’Ihuriro ry’Amarerero yigisha abana gukina umupira w’amaguru, “Ijabo Ryawe Rwanda”, aho hanatorewemo Komite Nyobozi nshya.

Uwari utegerejwe n’abatari bake mu matora y’uyu munsi, Sheikh Habimana Hamdan, yongeye kugirirwa icyizere, atorwa nk’umuyobozi mukuru w’iri huriro ku bwiganze bw’amajwi 100%, aho yari umukandida rukumbi.

Sheikh Habimana yari asanzwe ayobora “Ijabo Ryawe Rwanda” kuva mu 2017, akaba yaraje gusezera ku buyobozi mu 2023 ubwo yatorerwaga kuba Komiseri ushinzwe Tekinike n’Iterambere mu Ishyirahamwe ry’Umupira w’Amaguru mu Rwanda (FERWAFA). Muri icyo gihe, inshingano ze zasigaranwa na Harerimana Emmanuel.

Mu ijambo rye nyuma yo gutorwa, Sheikh Habimana yavuze ko icyizere yahawe n’abanyamuryango gishingiye ku murava, ubufatanye n’urukundo afitanye na bo.

Yagize ati: “Mbona ari icyizere nabubatsemo, urukundo n’ubufatanye kuko ntacyo nkora ntabagishije inama.”

Yagaragaje kandi intego zihutirwa harimo kongera imbaraga mu bufasha buhabwa amarerero, kwigisha abana gukina umupira bihoraho, guharanira uburenganzira bw’abana barererwa mu marerero no kongerera ubumenyi abayobozi n’abatoza, cyane cyane ku bijyanye n’amategeko n’imyitwarire y’umupira w’amaguru.

Hamwe na we, hatowe n’abandi bayobozi bashya bagize Komite Nyobozi barimo Gakwaya Olivier watorewe kuba Visi Perezida ushinzwe Umutungo, Uwamahoro Regine Diane watorewe kuba Visi Perezida ushinzwe Uburere n’Umuco, Ndayiragije Jean Bosco watorewe Amarushanwa, na Kubana Jean Bosco wagizwe Komiseri ushinzwe Tekinike n’Iterambere.

Sheikh Habimana agiye kongera kuyobora “Ijabo Ryawe Rwanda” kugeza mu 2027, igihe hazaba amatora mashya.

Ku itariki ya 2 Mata 2022, nibwo Sheikh Habimana Hamdan wari usanzwe ari umuyobozi wa Ijabo Ryawe Rwanda, yongeye kugirirwa icyizere aho yatowe n’abanyamuryango bose 125 batoye (100%), atorerwa indi manda y’imyaka itanu yarangiye mu cyumweru gishize .

Icyo gihe bari Abagize Komite Nyobozi nshya ya Ijabo Ryawe Rwanda barimo :

• Perezida: Sheikh Habimana Hamdan
• Visi Perezida ushinzwe Amarushanwa: Batariganya George
• Visi Perezida ushinzwe Imiyoborere: Musabyimana Justin
• Visi Perezida ushinzwe Uburere n’Umuco: Musanganwa Christine
• Visi Perezida ushinzwe Imenyekanishabikorwa: Harelimana Emmanuel
• Visi Perezida ushinzwe Iterambere na Tekinike: Ntibitura Jean Claude
• Umunyamabanga Mukuru: Mutezinka Prisca
• Umubitsi Mukuru: Ngaruyinka Pierre Célestin
• Komiseri w’Ababyeyi: Nisingizwe André
• Komiseri w’Iterambere na Tekinike: Dukuzimana Antoine
• Komiseri w’Iterambere ry’Abari n’Abategarugori: Mutuyimana Sophie
• Komiseri w’Imisifurire: Nzabahimana Emmanuel
• Komiseri w’Imibereho myiza n’Ubuvuzi bwa siporo: Rombe Salum
• Komiseri w’Itangazamakuru: Tegabanze Eric
• Komiseri ushinzwe Imenyekanishabikorwa no gushaka Abaterankunga: Byiringiro Claude Ally
• Komiseri w’Imyitwarire: Mungu Jitiada Vigoureux
• Komiseri wa Komite Ngenzuzi: Tuyisenge Salua
• Komiseri w’Akanama Nkempurampaka: Ntakirutimana Emmanuel
• Komiseri wa Komisiyo y’Ubujurire: Eng Nsengiyumva Jean Eric

Abanyamuryango bashya bakiriwe muri iyo nteko rusange

1.IGIHANGO SPORTS ACADEMY
2.KG RAIDERS FOOTBALL TRAINING CENTER
3. RAPID FOOTBALL TRAINING CENTER
4.AMFALA FOOTBALL TRAINING CENTER
5.RWANDA PEACE YOUTH FOOTBALL TRAINING CENTER
6.KAZO FOOTBALL TRAINING CENTER
7.INDAHANGARWA FOOTBALL TRAINING CENTER
8.LES AMIS SPORTIF
9.AMAHORO FOOTBALL TRAINING CENTER
10.EDEN FAMILY ACADEMY