Amakuru agezweho ku ngabo z’u Rwanda ziri i Cabo Delgado muri Mozambique

Umuyobozi Mukuru wa Reserve Force mu Ngabo z’u Rwanda (RDF), General Major Alexis Kagame, ari kumwe n’Umwungirije wa Polisi y’u Rwanda ushinzwe ibikorwa, Commissioner of Police Vincent B. Sano, bakiriye Ingabo z’u Rwanda zari mu bikorwa byo kugarura umutekano muri Cabo Delgado, muri Mozambique.

Uyu mutwe w’ingabo wageze ku Kibuga Mpuzamahanga cya Kigali kuri uyu wa 27 Ukwakira 2025 , uyobowe n’Umugaba w’Ishami rya RDF ryakoraga muri Mozambique, General Major Emmy K. Ruvusha, nyuma yo gusoza umwaka wuzuye w’ibikorwa.

Mu gihe cyo kubakira, General Major Kagame yashimiye izi ngabo umuhate, ubunyamwuga n’ubudasa byaziranze mu mwaka wose w’ibikorwa, nubwo hari imbogamizi zitandukanye bahuye nazo.

Yanabasabye gukomeza kurangwa n’imyitwarire myiza n’ikinyabupfura ku rwego rwo hejuru.

Mu Cyumweru gishize sosiyeti y’Abafaransa , TotalEnergies yemeje ko igiye gusubukura ibikorwa byayo byo gucukura gazi mu Ntara ya Cabo Delgado muri Mozambike ibyerekana ko umutekano muri aka gace ugeze aheza.

Nubwo bimeze bityo muri Nzeri ya 2025 abarwanyi b’Abajihadiste bagabye igitero banica abasivili bane mu gitero bagabye mu mujyi wa Macomia mu ntara ya Cabo Delgado mu majyaruguru ya Mozambique ibyatumye abantu bongera kwibaza ku mutekano waka gace.