Sudan: Umutwe wa Rapid Support Forces(RSF)  urashinjwa kwica abantu ibihumbi

Umunyamabanga w’Ububanyi n’Amahanga w’u Bwongereza, Yvette Cooper, yifatanyije n’abasaba ihagarikwa ry’ibikorwa by’intambara mu buryo bwihuse muri Sudani, nyuma y’uko bivugwa ko ibihumbi amagana by’abantu bishwe mu mujyi  wa  Al Fashir.

Abantu bagera ku 260,000, kimwe cya kabiri cyabo kikaba ari abana, bikekwa ko bashobora kuba barahejejwe  mu murwa mukuru wa Darfur nyuma y’uko umutwe   wa  Rapid Support Forces(RSF)  uwigaruriye.

Avugira i Bahrain ku wa Gatandatu, Madamu Cooper yamaganye “ibikorwa by’ubunyamaswa, ubwicanyi rusange, inzara n’ikoreshwa ry’ihohoterwa rishingiye ku gitsina nk’intwaro y’intambara” muri Darfur, avuga ko amakuru yavuye  muri ako karere  ateye ubwoba cyane.

Yagize ati: “Muri Sudani muri iki gihe hari agahinda gusa,” ubwo yavugaga mu nama ya Manama Dialogue Conference.

Yongeyeho ko nubwo hari “intambwe yatewe” mu kibazo cya Gaza, umuryango mpuzamahanga “wananiwe guhangana n’ihungabana ry’ubutabazi n’intambara y’ubwiyahuzi iri muri Sudani.”

Umutwe wa RSF umaze igihe urwana na leta ya Sudani kuva mu mwaka 2023, kandi ushinjwa gukora ibyaha byinshi byibasira uburenganzira bwa muntu muri iyo ntambara.

Madamu Cooper yanatangaje ko u Bwongereza bugiye kohereza imfashanyo ya miliyoni 5 z’amapawundi (£5m) muri Sudani, aho miliyoni 2 (£2m) zizibanda ku gufasha abakorewe ihohoterwa rishingiye ku gitsina.

Iryo tangazo ry’imfashanyo ryaje nyuma y’uko ingabo za RSF zigaruriye Al Fashir. Abasesenguzi bemeza ko ibihumbi amagana by’abantu bishwe mu minsi ibiri gusa, nk’uko Yousra Elbagir, umunyamakuru wa Sky News ukorera muri Afurika, yabivuze.

Amafoto yafashwe na satelite yakozweho isesengura na Yale Humanitarian Labs agaragaza ibimenyetso by’amaraso n’imirambo bigaragara mu isanzure.

Umuryango w’Abaganga ba Sudani nawo watangaje ko RSF yishe abantu bose yabonye mu bitaro bya Al Saudi, harimo abarwayi, abari babarwanyeho, n’abandi bose bari mu byumba by’abo barwayi, ibyo byose ikabikora “nta mbabazi, mu buryo bw’ubunyamaswa”.