RURA yagize icyo ivuga ku ibura rya murandasi ku murongo wa MTN

Urwego Ngenzuramikorere   rw’u  Rwanda, RURA, rwagragaje ko rwamenya ikibazo cya murandasi  cyabaye kuri kompanyi ya MTN  ndetse rwemeza ko iki kibazo ruri kugikurikirana.

Iri bura rya murandasi ku murongo wa MTN ryabaye  kuri uyu wa Gatatu tariki 12 Ugushyingo 2025,  ndetse iyi sosiyeti yiseguye ku bakiriya babo ku bwa serivisi itari nziza bakiriye.

MTN  yagize iti “Nshuti bakiliya, turifuza kubamenyesha ko turi guhura n’ibibazo muri serivisi za Interineti bitewe n’ikibazo cyabaye ku miyoboro mpuzamahanga inyura muri Uganda na Tanzania.”

Muri ubu butumwa, iyi Sosiyete yakomeje ivuga ko “Amatsinda y’abatekinisiye bacu ari gukorana imbaraga kugira ngo ihuzanzira rya Interineti ryongera gukora neza mu gihe cya vuba.”

Nyuma yuko MTN itangaje ubu butumwa bwo kwisegura, Urwego Ngenzuramikorere RURA, rwatangaje ko na rwo rwatangiye gukurikirana iby’iki kibazo.

Ubuyobozi bwa RURA bwagize buti “Turamenyesha abakoresha interineti ya MTN ko RURA iri gukurikirana iki kibazo, kugira ngo gikemurwe mu gihe cya vuba gishoboka.”

Serivisi za Interineti mu Rwanda zikunze guhura n’ihungabana, akenshi riterwa n’ibibazo by’imiyoboro ifatirwaho na sosiyete zo mu Rwanda zitanga serivisi z’itumanaho.