Umutoza wa APR FC yagaragaje impamvu nyamukuru yatsinzwe na Musanze FC

Umutoza wa APR FC, Taleb Abderrahim yasabye Imbabazi abafana b’iyi kipe y’ingabo z’igihugu nyuma yo gutsindirwa na Musanze kuri sitade Ubworoherane ibitego 3-2 mu mukino w’umunsi wa munani wa shampiyona.

Nyuma y’uyu mukino utarahiriye Ikipe y’ingabo z’Igihugu, umutoza Abderrahim Talib yemeye ko ikipe ye yitwaye nabi, yongeraho ko imiterere y’ikibuga yatumye batagaragaza umupira bamenyereye.

Muri uyu mukino, APR FC yinjijwe ibitego bitatu hakiri kare, ibintu byashyize igitutu gikomeye ku bakinnyi bayo. Nubwo barwanye bihagije mu gice cya kabiri bakabona ibitego bibiri, ntibyabahaye amahirwe yo kugarura amanota bari bategerejweho.

Taleb yavuze ko abakinnyi be bari bafite umurava n’ubushake bwo gukina ariko kubera imiterere y’ikibuga cyari cyanyagiwe byatumye batitwara nkuko bagombaga kwitwara.

Yagize ati: “Nk’uko mwabibonye, APR FC ntiyakinnye umupira wayo isanzwe ikina. Ubutaka, imvura n’ubwatsi bw’iki kibuga byatubangamiye cyane. Uko twageragezaga kubaka umukino ngo tubone ibitego, ibyo byose byaduteshaga icyerekezo.”

Uyu munya-Tunisia yanemeje ko ikibazo Atari ikingi za mwamba ze izirimo Niyigena Clement zaburaga kubera imvune ahubwo ko ahanini byaturutse ku kibuga kibi.

“Abakinnyi bacu bananiwe no guhagarara neza. Twagerageje kwiyubaka ariko biranga. Twakinnye n’ikirere n’ikibuga, biratunanira,”

Taleb utaremeza abafana ba Gitinyiro kuva yahagera yongeye kubiseguraho ndetse abizeza impinduka bigaragara mu mikino izakurikiraho.

Ati :”Ndasaba imbabazi abafana bacu baje kudushyigikira mu buryo bwose. Ndizera ko barebye umukino bakabona uko ibintu byari bimeze. Ubu turakora uko dushoboye ngo ku munsi ukurikiraho twitware neza.”

Ku wa Kabiri, tariki ya 25 Ugushyingo 2025, APR FC irasubira mu kibuga ihura na Marine FC mu mukino w’ikirarane cy’Umunsi wa Mbere wa Shampiyona.