Amashusho yasakaye ku mbuga nkoranyambaga agaragaramo umuhanzi B-Face w’i Burundi yumvikanamo avugamo amagambo y’ibitutsi ku Banyarwanda, byamenyekanye ko yabarwaniye ishyaka, kuko ari agace kakaswe mu kiganiro kirekire, yavugiyemo ko aheruka gushyamirana n’umuntu yumvise avuga nabi Abanyarwanda.
Amashusho y’uyu muhanzi yasakaye ku mbuga nkoranyambaga, yari yababaje benshi, aho uyu Muhanzi B-Face ukunze no gutaramira mu Rwanda yumvikana avuga amagambo mabi ku Banyarwanda.
Muri ayo mashusho yakaswe, hari aho uyu muhanzi aba agira ati “Abanyarwanda mwese muri imbwa, Abanyarwanda mwese muri imihirimbiri, Abanyarwanda mwese muri abagome.”
Aka gace kari kakaswe muri icyo kiganiro, kari katumye uyu muhanzi yijundikwa n’Abanyarwanda benshi, bamwe banabigaragariza ku mbuga nkoranyambaga, banenga uyu muhanzi kuba yabatutse.
Gusa byamenyekanye ko ari agace gato kakaswe mu kiganiro aherutse kugirana n’umunyamakuru wamubajije igihe aheruka kurwanira n’icyari cyabiteye.
Muri iki kiganiro, uyu muhanzi avuga ko ubwo umuhanzi Kirikou w’i Burundi aheruka gutaramira mu Rwanda akazimirizwaho ibyuma, hari mwene wabo w’Umurundi yumvise ari kuvuga nabi Abanyarwanda, bikamubabaza.
Ati “Umuniga yaraje avugira ahantu twari twicaye, aravuga ati ‘sha Abanyarwanda mwese muri imbwa, Abanyarwanda mwese muri imihirimbiri, Abanyarwanda mwese muri abagome’, ndangije ndamubwira nti ‘bro iyo uri kujeneraliza [gushyira abantu muri rusange] ikintu cyakoze umuntu umwe, uba uri gukora amakosa kubera ko Abanyarwanda, yaba Abarundi barabakeneye, n’abo Banyarwanda baradukeneye.”
Uyu muhanzi akomeza avuga byumwihariko mu ruganda rw’imyidagaduro, Abanyarwanda n’Abarundi baruhuje kuko banafite byinshi basangiye, yaba ururimi ndetse n’umuco.
Ati “Isoko ryabo riri hano, natwe isoko ryacu riri hariya, kubera ko ururimi ni rumwe. Rero iyo urimo uravuga ngo bose ni imbwa, uba uru kudekona [gutandukira] cyane rwose. Ubwo rero umujama ahita ambwira ngo ‘niba wumva wabavugira na we uri imbwa mu bandi’ […] ni wo munsi narwanye.”
Uyu muhanzi avuga ko ibyo yabwiwe n’uwo muntu wavugaga nabi Abanyarwanda byahise bimuzamurira umujinya, agahita amukubita umugeri.
IZINDI NKURU WASOMA
