Umutoza wa Manchester United, Ruben Amorim, yihagazeho ku cyemezo cyo kudakoresha Kobbie Mainoo, nyuma y’uko uyu mukinnyi wo hagati yongeye kurangiza umukino ari ku ntebe y’abasimbura ubwo United yanganyaga na West Ham kuri Old Trafford.
Muri uwo mukino warangiye ari igitego 1-1, United yabonye igitego cya mbere binyuze kuri Diogo Dalot ariko birangira itabashije kugumana amanota atatu.
Amorim yakoze impinduka eshanu zose yari yemerewe: Leny Yoro asimbura Ayden Heaven mu gice cya kabiri, Dalot ahabwa umwanya na Patrick Dorgu, hanyuma Manuel Ugarte na Mason Mount basimbura Matheus Cunha na Joshua Zirkzee. Mu minota y’inyongera, Luke Shaw yasimbuwe na Lisandro Martínez. N’ubwo ibyo byose byakozwe, Mainoo ntiyigeze ahabwa umwanya.
Mainoo aheruka kubanza mu kibuga muri Kanama, ubwo United yasezererwaga na Grimsby Town muri Carabao Cup.
Ku wa Gatandatu, yari ku ntebe ku nshuro ya kane muri Premier League adakandagiye mu kibuga, bikomeza kongera impaka ku hazaza he.
Abajijwe niba yakisubiraho ku mpinduka ze , Amorim yasubije ati: “Oya. Twari turi gutsindwa imipira ya kabiri. Kongera abakinnyi b’imbere si byo byadufashaga kuri ibyo bibazo.”
Abanyamakuru bamwibukije ko yashoboraga guhitamo Mainoo, maze araseka ati: “Yego, ariko nari mpangayikishijwe no gutsindwa n’imipira ya kabiri. Mount yakinaga mu mwanya we, Bruno ajya mu rubuga neza, naho Mbeumo yari adushyizeho igitutu. Ni yo mpamvu nabigenje kuriya.”
Mu gihe bivugwa ko Napoli ishobora kumutwara muri Mutarama, umutoza yavuze ko adashaka kureba Mainoo nk’umukinnyi ku giti cye, ati: “Muravuga cyane kuri Kobbie, ariko mfite n’abandi benshi bashaka World Cup. Ndamukoresha igihe mbona ari byo bituma ikipe itsinda.”
Nubwo igitutu cy’abafana gikomeje kwiyongera, Amorim ashimangira ko ibyemezo bye byose bishingiye ku nyungu z’ikipe yose, atari umuntu umuntu ku giti cye.
IZINDI NKURU WASOMA
M23 yamaze kwigarurira agace k’ingenzi muri Kivu y’Amajyepfo
Bizimana Djihad na Manzi Thierry bakoreye amateka muri Libya
