Ishyirahamwe ry’umupira w’amaguru ku isi, FIFA, ryatangaje ko ryashyizeho amatike mashya ahendutse angana na $60 (ni ukuvuga £45) ku mikino yose 104 izakinwa mu Gikombe cy’Isi cya 2026.
Ibi byatangajwe nyuma y’igitutu gikomeye cyaturutse ku bafana n’amashyirahamwe abahagarariye, banenze uburyo ibiciro byari byashyizweho mbere byari bihanitse cyane.
Nk’uko FIFA ibivuga, ayo matike mashya azahabwa umubare muto w’abafana yise “abizerwa” baturutse mu bihugu byamaze gukatisha itike yo kuzitabira iri rushanwa.
Umwe mu bayobozi ba FIFA wari hafi y’ibiganiro yavuze ko iki cyemezo cyafashwe nyuma yo kumva ibitekerezo by’abantu benshi, kandi ko cyemejwe ku bwumvikane busesuye.
Minisitiri w’Intebe w’u Bwongereza, Sir Keir Starmer, yakiriye neza iyi nkuru, ariko asaba FIFA kongera gushyira imbaraga mu gutuma amatike arushaho kugerwaho n’abafana basanzwe.
Yibukije ko na we yigeze kuzigama kugira ngo abashe kugura itike zo kureba ikipe y’Igihugu y’u Bwongereza, bityo ko umupira w’amaguru udakwiye gutandukana n’abawukunda by’ukuri.
Mbere y’iri hinduka, Ishyirahamwe ry’Abafana b’Umupira w’Amaguru (FSA) ryavugaga ko uburyo bwo kugena ibiciro bwari budakwiye, aho byari gusaba umufana arenga £5,000 kugira ngo akurikire u Bwongereza kuva mu matsinda kugeza ku mukino wa nyuma.
Itike ya £45 iri mu cyiciro cyo hasi cyiswe ‘supporter entry tier’, ikazaba igize 10% by’amatike azahabwa buri shyirahamwe ry’igihugu kizitabira irushanwa rizabera muri Canada, Mexique na Leta Zunze Ubumwe za Amerika. Ku Bwongereza na Ecosse, bivuze ko amatike agera kuri 400 azaboneka kuri iki giciro mu mikino yo mu matsinda.
IZINDI NKURU WASOMA
