Impuzamashyirahamwe y’umupira w’amaguru muri Afurika (CAF) ryatoranyije Abanyarwanda batandatu bazagira uruhare rukomeye mu itegurwa no mu micungire y’irushanwa rya TotalEnergies CAF Africa Cup of Nations (AFCON) 2025, riteganyijwe kubera muri Maroc.
Ibi ni ikimenyetso cy’icyizere CAF ifitiye u Rwanda n’ubunyamwuga bw’Abanyarwanda mu mupira w’amaguru ku rwego mpuzamahanga.
Aba banyarwanda bayobowe n’umusifuzi wo hagati Uwikunda Samuel, uri mu basifuzi 73 b’inararibonye batoranyijwe bazifashishwa muri iri rushanwa.
Muri rusange, harimo abasifuzi 28, abasifuzi bungirije 31 ndetse n’abashinzwe ikoranabuhanga rya VAR 14.
Abandi Banyarwanda bazagira uruhare muri AFCON 2025 barimo Jules Karangwa, Umuyobozi Mukuru wa Rwanda Premier League, wagizwe umuhuza mukuru (General Coordinator) wa Stade Olympique i Rabat.
Regis Francois Uwayezu azaba ari umwungiriza w’umuhuza mukuru wa Stade El Barid, na yo i Rabat. Hadidja Kayishakire yagizwe umukozi ushinzwe kwakira no kwita ku bashyitsi (Guest Management Officer) kuri Complexe Sportif Moulay Abdellah, stade izakira umukino wo gufungura irushanwa n’uwa nyuma.
Ku rundi ruhande, Sonia Isaro, ushinzwe ibirori muri FERWAFA, na we azaba ashinzwe kwakira abashyitsi kuri Grand Stade de Marrakech, mu gihe Mpambara Aloys azaba ashinzwe imicungire y’ikibuga (Pitch Management) kuri Tangier Grand Stadium.
AFCON 2025 izatangira ku Cyumweru tariki ya 21 Ukuboza 2025. Ikipe ya Côte d’Ivoire, yegukanye igikombe giheruka itsinze Nigeria ku mukino wa nyuma wabereye iwabo, izagera muri Maroc ishaka kurwanira igikombe cya gatanu cya Afurika.
IZINDI NKURU WASOMA
CAF yazibukiriye u Burayi ku ngingo y’igikombe cya Afurika
AFC/M23 yongeye kwikomba igihugu cy’u Burundi
