Mu mujyi wa Uvira no ku misozi iwukikije, kuri uyu wa kabiri tariki ya 23 Ukuboza 2025, hagarutse ituze nyuma y’ijoro n’umunsi byabanjirijwe n’urusaku rukomeye rw’amasasu rwumvikanye mu bice bitandukanye by’uyu mujyi wo mu ntara ya Kivu y’Epfo.
Amakuru aturuka mu baturage n’abandi bakurikirana umutekano avuga ko mu ijoro ryo ku wa mbere rishyira ku wa kabiri umutekano wari umeze neza, nta kurasana kongeye kumvikana. Umwe mu batuye Uvira yagize ati: “Twabyutse neza muri iki gitondo, umutekano wari wose. Nta mbunda zongeye kuvuga mu ijoro.”
Ibyo bibaye nyuma y’uko ku munsi wabanje hiriwe humvikana amasasu menshi mu bice birimo Kasenga, Mulongwe na Kalundu, aho bivugwa ko urwo rusaku rwatewe n’abarwanyi ba Wazalendo, mu byo bise ingamba zo guhungabanya imyigaragambyo yari irimo kuba muri ako gace.
Iyo myigaragambyo yavuzwe nk’igikorwa mu rwego rwo kwamagana icyemezo Amerika yatanze isaba AFC/M23 kuvana ingabo zayo mu mujyi wa Uvira. Gusa, amakuru aturuka mu baturage agaragaza ko hari abifuza ko uwo mutwe waba ari wo ubayobora, bashinja Wazalendo, FDLR n’ingabo za FARDC ibikorwa byo kubica no kubahohotera—ibirego bikomeje guteza impaka zikomeye mu baturage.
Ibi bibaye mu gihe AFC/M23 ikomeje kuvugwaho kwagura ibirindiro byayo. Amakuru avuga ko uwo mutwe wasubije inyuma ihuriro ry’ingabo za Leta ya RDC nyuma y’ibitero byari byagabwe ahitwa Ngalula Kaseke muri Makobola.
Andi makuru yizewe akomeza avuga ko ingabo za Leta ziri mu myanya yo kurwana mu bice bya Munene, mu cyerekezo cya Mboko, mu gihe abaturage bakomeje gusaba ituze rirambye n’ibisubizo bya politiki byarandura umutekano muke umaze igihe mu karere.
Nubwo ituze ryagarutse by’agateganyo muri Uvira, abakurikiranira hafi ibibera muri aka gace bagaragaza ko umutekano ugikomeje kuba muke, bityo hakenewe ingamba zihamye zo kurinda abasivili no gukumira isubukurwa ry’imirwano.
IZINDI NKURU WASOMA
Rayon Sports igeze kure ku isoko ry’igura n’igurisha
Congo igiye kubaka umujyi w’igitangaza
