Antoine Semenyo, rutahizamu w’ikipe ya Bournemouth n’umukinnyi mpuzamahanga wa Ghana, ari mu biganiro bigeze kure byo kwerekeza muri Manchester City mu isoko ryo muri Mutarama.
Amakuru dukesha ikinyamakuru Team Talk avuga ko City imaze gutera intambwe ishimishije ku buryo yiyumva neza ko ishobora gusinyisha uyu mukinnyi ufite imyaka 25.
Nubwo Manchester City isa n’iyamaze kujya imbere muri uru rugamba, Semenyo yari yanifujwe n’andi makipe akomeye yo mu Bwongereza arimo Manchester United, Liverpool, Tottenham na Chelsea.
Gusa amakuru avuga ko United yaretse gukomeza ibiganiro nyuma yo kubona ko amahirwe menshi ari aya City, mu gihe Chelsea yo yahisemo kutinjira cyane muri dosiye ye.
Liverpool yakurikiranye uko amasezerano yakorwa, kandi ishobora kongera umuvuduko bitewe n’imvune ya Alexander Isak, mu gihe Tottenham yo igaragara nk’ifite amahirwe make.
Semenyo afite ingingo y’amasezerano imwemerera kugurwa ku mafaranga angana na miliyoni 65 z’amapawundi, ariko iyo ngingo izaba ikora gusa mu minsi 10 ya mbere ya Mutarama.
Ni yo yafashije Bournemouth kumugumana ubwo yongeraga amasezerano muri Nyakanga uyu mwaka. Mu mpeshyi, ayo mafaranga ashobora kugabanuka ho gato.
Bournemouth yemera ko ishobora kumutakaza, ariko ishobora kuganira n’ikipe yemera ko yagumana Semenyo kugeza shampiyona irangiye.
Umutoza Andoni Iraola yavuze ko nubwo hari urusaku rwinshi ku isoko ry’igura n’igurisha, Semenyo akomeje kwitangira ikipe kandi atagamije guteshuka ku nshingano ze.
Ku ruhande rwe, Semenyo azafata icyemezo ashingiye ku mushinga uzamukurura, cyane cyane uzamufasha guhatanira ibikombe bikomeye mu gihe kirekire.
Azanareba aho umuryango we wazagira imibereho myiza, kandi ntiyifuza ko ibi biganiro byakomeza igihe kirekire.
IZINDI NKURU WASOMA
Rayon Sports yahuye n’uruva gusenya
