Mu ntara ya Kivu y’Amajyaruguru, ihuriro rya Alliance Fleuve Congo (AFC/M23) ryafashe igice cya Ndurumo, giherereye muri gurupema ya Luberike, muri teritwari ya Walikale.
Abaturage bo muri ako gace bavuga ko Ndurumo yafashwe ku masaha ya nimugoroba yo ku wa Kabiri, tariki ya 23/12/2025.
Ubuyobozi bw’akarere bwamaganye bikomeye iki gikorwa, bushinja AFC/M23 guhonyora amasezerano ya Washington na Doha, agamije guhagarika imirwano no gushyiraho inzira irambye y’amahoro mu Burasirazuba bwa Repubulika Iharanira Demokarasi ya Congo (RDC).
Abasesenguzi bigenga ku by’umutekano n’imibanire mpuzamahanga bavuga ko ifatwa ry’iki gice gishya muri Walikale ari ikimenyetso cy’uko izi nyeshyamba zikomeje kwagura ibirindiro byazo mu Ntara za Kivu y’Amajyepfo n’iya Ruguru.
Bitewe n’ibi, abo basesenguzi basaba abahuza b’Abanyamerika n’Abanya-Qatar gukomeza gushyira igitutu ku mpande zishyamiranye, kugira ngo amasezerano y’amahoro yubahirizwe, bityo amahoro arambye abe impamo mu Burasirazuba bwa RDC, aho abaturage bamaze igihe kirekire bahangayikishijwe n’intambara n’ibibazo by’ubutabazi.
Iki gikorwa kije mu gihe amahanga akomeje gukurikirana hafi ibibera muri aka karere, aho amahoro n’umutekano by’Akarere k’Ibiyaga Bigari bikomeje kwibasirwa n’iyi ntambara idashira.
IZINDI NKURU WASOMA
Umujyi wa Betelehemu Yezu/Yesu yavukiyemo wizihije Noheli ibidasanzwe
