Rayon Sports yahagaritse undi mu kinnyi

Umukinnyi ukina hagati mu kibuga wa Rayon Sports, Bigirimana Abedi ukomoka mu Burundi, yahawe ibihano by’imbere mu ikipe nyuma y’imyitwarire itanyuze abatoza n’ubuyobozi, aho yashinjwe gushaka kwihitiramo imikino akinamo.

Bigirimana Abedi wari umaze igihe gito agarutse mu kibuga avuye mu mvune yo munsi y’ikirenge, ntiyigeze agaragara mu mukino wa Super Cup wahuje Rayon Sports na APR FC ku wa Gatandatu tariki 10 Mutarama 2026.

Uyu mukino warangiye APR FC itsinze Rayon Sports ibitego 4-1, mu mukino utanyuze abakunzi b’iyi kipe yo mu Nzove.

Bigirimana Abedi yari yicaranye n’abandi bakinnyi barimo Tambwe Gloire na Drissa Kouyaté mu bafana, nyuma y’uko umutoza Bruno Ferry atabifuje kubakoresha kubera itegeko rya FERWAFA rigena ko abanyamahanga umunani gusa ari bo bemerewe kugaragara ku rupapuro rw’umukino.

Nyuma y’uyu mukino, abakinnyi basabwe gusubira mu myitozo bitegura umukino wa gicuti Rayon Sports ifitanye na Al Hilal Omdurman uteganyijwe ku wa Gatandatu tariki 17 Mutarama 2026. Abakinnyi bose bitabiriye imyitozo, uretse Bigirimana Abedi wamenyesheje umutoza ko atazawukina kubera ikibazo cy’ivi.

Ibi byafashwe n’abatoza nk’imyitwarire itari iya kinyamwuga, cyane ko uyu mukinnyi atari yagaragaje icyo kibazo mu buryo bugaragara mbere.

Amakuru avuga ko Bruno Ferry atanyuzwe n’iyi myitwarire, ndetse agasaba ko hafatwa ingamba ku mukinnyi ugaragaza ko ashaka gukina imikino yifuza gusa.

Umuvugizi wa Rayon Sports ,Olivier Gakwaya yatangaje ko Bigirimana yamaze guhabwa igihano, ashimangira ko ari igihano cyo gukorera ku ruhande, ahakana amakuru yavugaga ko umutoza yasabye ko yakurwa burundu mu ikipe.

Bigirimana Abedi abaye umukinnyi wa kabiri uhawe ibihano muri Rayon Sports nyuma y’umukino batsinzwemo na APR FC, nyuma ya Ndikumana Asmane nawe wahaniwe gutongana n’umutoza Bruno Ferry.