Amakuru agezweho ku makimbirane ya Kabila na Tshisekedi

Mu gihe Repubulika ya Demokarasi ya Congo ikomeje gushakisha inzira ziganisha ku bwumvikane bwa politiki, amakuru yizewe aturuka mu nzego za gisirikare agaragaza ko Joseph Kabila Kabange, wahoze ari Perezida w’igihugu, ashobora kugirwa umwere n’urukiko rwa gisirikare mu minsi ya vuba.

Aya makuru avuga ko uru rubanza rushobora kurangira ibirego byose byari byaramushinjwe bisheshwe burundu, hashingiwe ku makosa yagaragaye mu mikorere y’iperereza no ku kudahuza kubyo yashinjwe n’ibimenyetso byatanzwe.

Abasesenguzi babona ko iyi myanzuro, niramuka ifashwe, izafatwa nk’intambwe ikomeye mu gushyira mu bikorwa ubushake bwa politiki bwo gukosora amakosa y’ubucamanza yaranze RDC ibihe bishize, no gutegura inzira nshya ya politiki yemerera ibiganiro bigari bihuriweho n’impande zitandukanye za politiki.

Ibi bihuzwa n’ingamba Perezida Félix Antoine Tshisekedi arimo gushyira imbere, zigamije kongera kwimakaza ubwiyunge bw’igihugu no guhuza abanyapolitiki batandukanye mu rwego rwo guhangana n’ibibazo by’umutekano n’ubukungu bikomeje gushegesha igihugu.

Nubwo nta tangazo ryemewe rirashyirwa ahagaragara n’inzego z’ubucamanza cyangwa iza Leta, amakuru akomeje guhererekanywa agaragaza ko hari ibiganiro bikomeje hagati y’abafatanyabikorwa batandukanye ku cyerekezo gishya cya politiki ya Congo-Kinshasa.