Umwana wo mu karere ka Gatsibo ufite ubumuga wagaragaje impano idasanzwe mu guconga ruhago yasuwe n’Ishyirahamwe Nyarwanda ry’Umupira w’Amaguru w’Abafite Ubumuga (RAFA) ndetse n’ubuyobozi bw’akarere ka Gatsibo.
Nizeyimana Théoneste yagenewe ibikoresho bitandukanye birimo imyambaro ndetse n’inkweto bizamufasha gukomeza kuzamura impano ye yo guconga ruhago.
Ni igikorwa cyabaye kuri uyu wa 31 Ukwakira 2025, ni nyuma y’amashusho yakwirakwijwe ku mbuga nkoranyambaga agaragaza Nizeyimana ari gukina umupira, ibintu byakoze ku mitima ya benshi, barimo abakunzi ba ruhago n’abantu batandukanye.
Nyuma yo kubona ayo mashusho, Minisiteri ya Siporo yemeye gufatanya na RAFA mu kumufasha guteza imbere impano ye. Mu mpera z’ukwezi kwa Ukwakira, Nizeyimana yasuwe n’abayobozi batandukanye bamushyikiriza ibikoresho bya siporo, imbago zimufasha gukina ndetse banasezeranya ko bazamufasha kubona inyunganirangingo.
RAFA yatangaje ko uyu mwana azafashwa no kwiga ahantu hazamufasha kurushaho guteza imbere impano ye, kandi azitabira Shampiyona y’Abafite Ubumuga izabera i Kigali ku wa 22 Ugushyingo 2025.
Nizeyimana yabwiye abayobozi ko afite inzozi zo kuzareba umukino uzahuza APR FC na Rayon Sports, bakamwemerera ko ayo marangamutima azasohora. RAFA yemeje ko inzozi ze zizasohora ku wa Gatandatu ubwo azareba iyo “derby” kuri Stade Amahoro.
Iri shyirahamwe ryashimiye buri wese wagize uruhare mu gufasha uyu mwana, rikemeza ko rikomeje gahunda yo guteza imbere impano z’abafite ubumuga binyuze mu marushanwa atandukanye, mu bagabo no mu bagore, kugira ngo bagaragaze ubushobozi n’impano zabo muri siporo y’umupira w’amaguru.
IZINDI NKURU WASOMA
Umunya-Uganda yabonye umwanya ukomeye muri guverinoma ya Amerika
