Barcelona ku isoko ry’igura n’igurisha

Ku isoko ry’igura n’igurisha ryo mu Burayi, izina rya Marcos Senesi rikomeje kuvugisha benshi, cyane cyane abafana ba FC Barcelona.

Uyu myugariro w’imyaka 28 ukomoka muri Argentine, ukinira Bournemouth mu Bwongereza, ari mu bakinnyi bashobora guhindura amateka y’ubwugarizi bwa Barça mu gihe cya vuba.

Barcelona iri kuyobora La Liga muri iki gihe ifite imbaraga mu gusatira izamu ariko igaragaza intege nke mu bwugarizi.

Gutakaza Iñigo Martínez byasize icyuho gikomeye, bituma ubuyobozi bw’ikipe bwibaza uko bwakongera gushimangira inyuma hatabayeho gukoresha amafaranga menshi.

Senesi ni umwe mu bakinnyi bashyizwe imbere. Nubwo agifite agaciro kagera kuri miliyoni 22 z’amayero, amasezerano ye na Bournemouth azarangira mu mpeshyi iri imbere, bikaba bivuze ko ashobora kugenda nta mafaranga yishyuwe.

Ubuyobozi bwa Bournemouth bwagerageje kuyavugurura inshuro nyinshi, ariko uyu myugariro akabyanga, agaragaza ko ashaka guhangana ku rwego rwo hejuru.

Kuva yagera muri Bournemouth mu 2022 avuye muri Feyenoord ku mafaranga ya miliyoni 15 z’amayero, Senesi yabaye inkingi ya mwamba.

Muri uyu mwaka w’imikino amaze gukina imikino 16 ya Premier League, atanga imipira 3 yavuyemo ibitego, ibintu bidakunze kuranga ba myugariro bo hagati mu mutima w’ubwugarizi.

Uburyo asohorana umupira n’ubushobozi bwo gukina n’amaguru byatumye benshi bavuga ko afite “DNA ya Barcelona”.

Nubwo Barça iri imbere mu biganiro by’ibanze, Juventus yo mu Butaliyani na Atlético de Madrid na zo ziri kumwifuza. Diego Simeone yaba amubona nk’usimbura José María Giménez, mu gihe Juventus ishaka gukemura ikibazo cy’imvune zikomeje kuranga ubwugarizi bwayo.

Mu gihe isoko ry’itumba ryegereje, Bournemouth ishobora kwemera kumurekura ku giciro gito kugira ngo idatakaza byose. Ku ruhande rwa Barcelona, Senesi afatwa nk’amahirwe adasanzwe yo kubona umusimbura ukomeye ku giciro giciriritse.