Ikipe ya Rayon Sports yamaze kwemeza Umufaransa Bruno Ferry nk’umutoza mushya w’iyi kipe, ku masezerano y’amezi atandatu, mu rwego rwo kongera gushaka umusaruro mwiza nyuma y’ibihe bitari byiza irimo.
Uyu mutoza w’imyaka 58 azagera mu Rwanda mu gitondo cyo ku wa Gatanu, aho ateganya guhita atangira imirimo yo kwegera abakinnyi n’abayobozi b’ikipe.
Amakuru agera kuri The Drum avuga ko Bruno Ferry ashobora kubanza gukurikira umukino Rayon Sports izakiramo Gorilla FC saa Kumi n’Ebyiri kuri Kigali Pelé Stadium, akawureba nk’umushyitsi wihariye, mbere yo gutangira imirimo ku mugaragaro.
Ni amahirwe azamufasha gusuzuma urwego rw’ikipe ashinzwe n’imiterere ya Shampiyona y’u Rwanda.Bruno Ferry aje muri Gikundiro asimbura Afhamia Lotfi wirukanwe mu Ukwakira 2025, nyuma y’umusaruro utanyuze abakunzi n’abayobozi b’iyi kipe ikunzwe na benshi.
Muri uru rugendo rushya, azungirizwa n’abatoza Lomami Marcel na Haruna Ferouz, bamaze kumenyera umupira w’u Rwanda ndetse n’imikorere ya Rayon Sports.
Uyu mutoza afite ubunararibonye mu mupira wa Afurika, aho mu 2024 yatoje Azam FC yo muri Tanzania, ayifasha mu mikino mpuzamahanga n’iya shampiyona.
Nyuma yo kuyivamo, yahise yerekeza muri AS Vita Club yo muri Repubulika Iharanira Demokarasi ya Congo, ari na yo aherukamo mbere yo kugera mu Rwanda.
Abakunzi ba Rayon Sports biteze ko Bruno Ferry azazana impinduka nziza, by’umwihariko mu mitegurire y’abakinnyi, imikinire y’ikipe n’umusaruro ku kibuga.
Iminsi iri imbere ni yo iragaragaza niba aya masezerano y’amezi atandatu azatanga icyizere gishya kuri Gikundiro.
IZINDI NKURU WASOMA
Mikel Arteta yahawe amahirwe yo kongera kwikiranura na Enzo Maresca
Kigali: Umusore yishe mugenzi we bapfa umukiriya!
