Imvura nyinshi n’imiyaga ikaze by’igihe cy’itumba bikomeje gukaza umurego w’ibibazo by’ubutabazi mu gace ka Gaza, aho imibereho y’abaturage isanzwe yarashegeshwe n’intambara n’ibura ry’ibikoresho by’ibanze irushaho kujya mu kaga.
Nk’uko imiryango mpuzamahanga itanga ubutabazi ibitangaza, ibi bihe by’ikirere byongereye ubukana bw’ingaruka z’ibibazo by’ubutabazi byari bisanzwe bihari.
Imvura idasanzwe yibasiye utu duce yateye imyuzure mu nkambi z’agateganyo zicumbikiwemo Abanya-Palestina benshi bahunze, amahema menshi yarengewe n’amazi, ibikoresho by’ibanze birangirika, mu gihe ubuzima bw’abaturage, by’umwihariko abagore, abana n’abageze mu zabukuru—bukomeje kujya mu kaga gakomeye.
Byongeye kandi, inyubako nyinshi zasizwe zisa n’izihagaze gusa nyuma y’imirwano zikomeje gusenyuka bitewe n’imvura n’imiyaga bikabije, ibintu bikomeje guteza impungenge zikomeye ku mutekano w’abazirimo n’abazituriye.
Ibi byiyongeraho ibibazo bikomeye by’ibura ry’ibiribwa, amazi meza n’ubuvuzi, bigatuma ibikorwa by’ubutabazi bigorana cyane kandi ntibibashe kugera ku bantu bose babikeneye byihuse.
Imiryango itanga ubutabazi irasaba umuryango mpuzamahanga kongera inkunga n’ubufasha bwihutirwa, hakajyaho ingamba zidasubirwaho zo kurinda abasivile no gushyigikira ibisubizo birambye byagabanya ingaruka z’ibi bihe by’ikirere bikomeje guhungabanya imibereho y’abaturage ba Gaza.
IZINDI NKURU WASOMA
