Hamenyekanye akayabo k’amafaranga kagendeye mu bukwe bw’umuhanzi Mr. Eazy na Temi Otedola  

Umuhanzi w’Umunya-Nigeria Mr Eazi we yaciye agahigo mu gukora ubukwe butazibagirana mu mitwe y’abakurikirana hafi isi y’imyidagaduro,nyuma yuko byemezwa ko bwatwaye arenga miliyari 14 z’amafaranga y’u Rwanda.

Mr Eazi yashyingiranywe n’umukinnyi wa filime Temi Otedola, umukobwa w’umuherwe w’Umunya-Nigeria Femi Otedola.

Nubwo ubukwe bwabo butigeze buhabwa umwanya munini mu itangazamakuru rya Afurika, bwaciye ibintu ku mbuga mpuzamahanga kubera uburyo bwabereye mu bihugu bitandukanye no mu buryo bwihariye.

Nk’uko byatangajwe n’ikinyamakuru Vogue, ubukwe bwatangiye tariki ya 9 Gicurasi 2025 i Monte Carlo, muri Monaco, mu birori byabereye muri Villa La Vigie – inzu y’amateka yigeze guturwamo n’umunyamideli w’icyamamare Karl Lagerfeld. Uwo munsi ni nawo Mr Eazi yahisemo mu rwego rwo kunamira umubyeyi we witabye Imana ku itariki nk’iyo.

Temi yari yambaye imyenda ya Wiederhoeft hamwe n’amasaro ya Briony Raymond, naho Mr Eazi yaserutse mu myambaro ya Louis Vuitton.

Ubukwe bwakurikiyemo bwabaye tariki ya 5 Nyakanga 2025 i Dubai, mu muhango gakondo w’Aba-Yoruba. Temi yaserutse mu myambaro ya Lisa Folawiyo na Oscar de la Renta, abahanga b’imideli b’ibyamamare ku rwego mpuzamahanga.

Igice cya nyuma cy’ubu bukwe, cyiswe “grand finale”, cyabaye ku wa 8 Kanama 2025 muri Hallgrimskirkja Church i Reykjavik muri Iceland. Temi yari yambaye ikanzu ya Fendi Haute Couture, yahanzwe hagendewe ku mwambaro wa Audrey Hepburn, naho Mr Eazi yambara Yves Saint Laurent.

Amakuru yizewe dukesha ikinyamakuru Pulse Nigeria yemeza ko ubukwe bwose hamwe bwatwaye amafaranga arenga miliyoni 10 z’amadolari ya Amerika, ni ukuvuga asaga miliyari 14 z’amafaranga y’u Rwanda.