Umukinnyi ukiri muto wa FC Barcelona, Lamine Yamal, amaze gushyira izina rye mu mateka y’umupira w’amaguru ku rwego rw’isi nyuma yo gushyirwa ku rutonde rw’abakinnyi 10 bahembwa amafaranga menshi ku isi rwatangajwe n’ikinyamakuru Forbes.
Yamal w’imyaka 18 y’amavuko gusa, yashyizwe ku mwanya wa 10 kuri uru rutonde, aho bivugwa ko azinjiza agera kuri 62,141,665,000 Frw, harimo umushahara we ndetse n’amafaranga akura mu bikorwa byo kwamamaza. Yatangiye kwigaragaza muri FC Barcelona muri 2023, aho yahise akurura amaso y’abakunzi b’uyu mukino kubera impano idasanzwe.
Ku isonga kuri uru rutonde haragaragaraho Cristiano Ronaldo, rutahizamu wa Al Nassr yo muri Saudi Arabia, winjiza 404,643,400,000 Frw, harimo 332,385,650,000 Frw ahembwa n’ikipe ye, n’andi 72,257,750,000 Frw ava mu bo yamamariza nka Binance, Nike na Herbalife. Uyu mukinnyi w’imyaka 40, akomeje guca uduhigo haba mu ikipe y’igihugu ya Portugal no mu makipe atandukanye akinira.
Lionel Messi w’imyaka 38, akaba akinira Inter Miami muri Leta Zunze Ubumwe za Amerika, yashyizwe ku mwanya wa kabiri n’inyungu zingana na 187,870,150,000 Frw, akura mu mushahara no mu bucuruzi bwe bwo kwamamaza.
Karim Benzema, ukinira Al Ittihad, ari ku mwanya wa gatatu n’ayo 150,296,120,000 Frw. Kylian Mbappé wa Real Madrid na Erling Haaland wa Manchester City bakurikiraho, binjiza 137,289,725,000 Frw na 115,612,400,000 Frw.
Ku mwanya wa gatandatu haza Vinicius Jr. wa Real Madrid, wakusanyije 86,709,300,000 Frw, naho Mohamed Salah wa Liverpool ari ku mwanya wa karindwi n’akayabo ka 79,483,525,000 Frw.
Sadio Mané wo muri Senegal, ukinira Al Nassr, ari ku mwanya wa munani n’ayo 78,038,370,000 Frw, akurikiwe na Jude Bellingham wa Real Madrid ku mwanya wa cyenda n’ayangana na 63,586,820,000 Frw.
Lamine Yamal, wari umaze imyaka ibiri gusa agaragaye mu mupira w’abakuru, yahawe amasezerano maremare na FC Barcelona, akaba afite ibigo bikomeye bimufasha kwinjiza arimo n’abafatanyabikorwa bamuhaye agera kuri Miliyoni 10 z’amadolari.
IZINDI NKURU WASOMA
