TRANSFER: Christopher Nkunku agiye kubisikana na Alejandro Garnacho muri Chelsea

Mu mpinduka zikomeye ku isoko ry’igura n’igurisha ry’abakinnyi ku mugabane w’u Burayi, ikipe ya AC Milan yamaze kumvikana na Chelsea ku igura rya rutahizamu Christopher Nkunku ku kayabo ka miliyoni £36 z’amapawundi, harimo n’inyongera zizashingira ku musaruro we.

Nkunku w’imyaka 27 yemeye kugabanya umushahara kugira ngo asinye amasezerano y’imyaka itanu muri iyi kipe yo mu Butaliyani.

Nk’uko amakuru aturuka hafi y’ayo makipe abyemeza,ikipe ya Chelsea yamaze guha Nkunku uruhushya rwo kujya gukora ikizamini cy’ubuzima, kimwe mu byemezo bigaragaza ko iyi transfert iri mu nzira igana ku musozo.

Muri aya masezerano, Chelsea yashyizemo n’ingingo y’uko izabona inyungu igihe Nkunku yagurishwa n’iyi kipe mu gihe kiri imbere.

Iyi ntambwe ikomeye ya Nkunku iva muri Chelsea iratuma iyi kipe y’i Londres igira amahirwe yo gutera intambwe igana ku gusinyisha Alejandro Garnacho, rutahizamu w’umunya-Argentine w’imyaka 21 ukinira Manchester United.

Garnacho kugeza ubu nta mukino n’umwe arakina muri uyu mwaka w’imikino, ndetse ari mu bakinnyi bamaze igihe badakora imyitozo hamwe n’abandi mu ikipe nkuru.

Nubwo Chelsea na Manchester United batarumvikana ku kiguzi cy’uyu mukinnyi, amakuru yizewe yemeza ko ibiganiro bigeze kure.

Ibi bivuze ko Chelsea ishobora gukomeza kubaka ikipe nshya, cyane ko n’undi mukinnyi wayo, Nicolas Jackson, ari mu biganiro byo kugenda ku buryo bw’inguzanyo ajya muri Bayern Munich, aho bishoboka ko iyi kipe yo mu Budage yamugura burundu nyuma y’igihe runaka.

Christopher Nkunku, nyuma yo kugurwa na Chelsea avuye muri RB Leipzig mu 2023 ku gaciro ka miliyoni £52, yayitsindiye ibitego 18 akanatanga imipira 5 yavuyemo ibitego mu mikino 62 yakinnye.

Uyu mukinnyi w’Umufaransa yari umwe mu nkingi za mwamba zafashije Chelsea kwegukana  igikombe cy’Isi cy’amakipe (Club World Cup 2025) ndetse na Conference League muri uyu mwaka.