Kuva ku wa Kabiri tariki 2 Ukuboza 2025, imirwano hagati y’umutwe wa M23 n’Ingabo za Congo (FARDC), zishyigikiwe n’inyeshyamba za Wazalendo hamwe n’Ingabo z’igihugu cy’u Burundi (FDNB) irakomeje.
Ibisasu byumvikanye kugeza ku misozi y’u Burundi ihana imbibi n’umugezi wa Rusizi. Ibisasu byaguye ku butaka bw’u Burundi byateje ubwoba, mu gihe Abanyekongo bahunze imirwano bangiwe kwinjira mu Burundi.
Hashize iminsi ibiri amasasu na bombe bitigisa imijyi ya Katogota, Luvungi, na Kamanyola muri Kivu y’Amajyepfo. Ku misozi ya Rukana na Mparambo, muri Komini ya Cibitoke, Intara ya Bujumbura, ubwoba ni bwose abaturage bahagaritse kujya mu mirima, batinya ko imirwano yinjira mu ruhande rw’u Burundi.
Nk’uko abatangabuhamya benshi bavuganye na SOS Médias Burundi babitangaza, byibura ibisasu bitatu byarasiwe i Kamanyola byaguye ku butaka bw’u Burundi, hafi ya Gatoki, muri zone Rukana.
Nta muntu wapfuye cyangwa ngo hagire ibyangirika. Amakuru akomeza avuga ko abasirikare b’u Burundi bari mu misozi miremire ya Gurupoma ya Bwegera zasubije zirasa i Kamanyola.
Ku mugoroba wo kuri uyu wa Gatatu, Lawrence Kanyuka, Umuvugizi wa M23 yashyize ahagaragara itangazo rivuga ko abaturage bane bishwe abandi batandatu barakomereka mu duce twinshi twa Kamanyola.
Ku ruhande rw’inkombe za Congo, Imbonerakure, Urubyiruko rwa CNDD-FDD, ishyaka riri ku butegetsi mu Burundi, bashyigikiwe n’abasirikare b’Abarundi, babujije Abanyekongo bahunga kwambuka Uruzi rwa Rusizi gusa guverinoma y’u Burundi ntacyo iratangaza ku mugaragaro ikiri kujya mbere.
IZINDI NKURU WASOMA
