Umutegarugori w’imyaka 27 ukomoka mu gihugu cya Palestine, Nadeen Ayoub, agiye kuba umugore wa mbere ugiye guhagararira Abanyapalestina mu irushanwa rya Misi w’Isi (Miss Universe).
Umuryango wa Miss Universe (MUO) mu itangazo wanyujije mu kinyamakuru cya CNN ku Cyumweru bemeje ko bishimiye kwemeza ko Ayoub azahatana mu irushanwa rya Miss Universe 2025 rizaba mu Ugushyingo kwa 2025.
Iri tangazo ryagize Riti: “Umuryango wa Miss Universe wishimira kwakira abahatana baturutse ku isi hose, mu kwizihiza ubutandukane, ihanahana ry’umuco no guteza imbere abagore.”
Ayoub azahatana n’abakobwa baturutse mu bihugu n’intara birenga 130 mu irushanwa rya 74 rya Miss Universe, rizabera ku itariki ya 21 Ugushyingo i Bangkok, muri Thailande.
Ayoub, ubu ufite imyaka 27, yambitswe ikamba rya Miss Palestine mu 2022, nk’uko byatangajwe n’ikinyamakuru cyo muri Abu Dhabi kitwa The National.
Ku wa Kane abinyujije kuri Instagram, Ayoub yavuze ko ashaka kuba ijwi ry’Abanyapalestina.
“Nishimiye gutangaza ko ku nshuro ya mbere mu mateka, Palestina izahagararirwa muri Miss Universe,” ni ko yanditse.
Icyemezo cyo gushyira Umunyapalestina mu irushanwa ry’ubwiza kije mu gihe ibihugu byinshi biri kunenga intambara ya Israel muri Gaza.
Nibura abantu 62,004 bamaze kwicirwa muri Gaza kuva intambara yatangira mu Ukwakira 2023, nk’uko byatangajwe na Minisiteri y’Ubuzima ya Palestina ku wa Mbere.
N’ubwo ubuyobozi bwa Gaza budatandukanya abasivili n’intagondwa za Hamas mu kugaragaza imibare, Minisiteri y’Ubuzima ndetse n’Umuryango w’Abibumbye bavuze ko abenshi mu bishwe ari abagore n’abana.
IZINDI NKURU WASOMA
Meta ifite Facebook na Instagram iri mu mazi abira
