Iran yongeye gufatirwa ibihano

Akanama ka Loni gashinzwe Umutekano ku isi katoye  icyemezo cyo kongera gushyiriraho ibihano kuri Irani kubera kutubahiriza amasezerano yo muri 2015 agena imikoreshereze  ya nikleyeri.

Iki cyemezo cyasabwe n’ibihugu bitatu by’i Burayi  birimo Ubwongereza, Ubufaransa n’u Budage bizwi nka  E3, bishingiye ku makenga bafite ku myitwarire ya Irani.

Aya masezerano azwi nka Joint Comprehensive Plan of Action [JCPOA] yashyizweho hagati ya Irani n’ibihugu bya P5+1 [Ubushinwa, Ubufaransa, Uburusiya, Ubwongereza, Leta Zunze Ubumwe za Amerika n’u Budage], agamije gukumira ko Irani ikora intwaro za kirimbuzi za nikileyeri zirengeje urugero.

Ibihugu bya E3 bivuga ko Irani yarenze ku mabwiriza akubiye muri aya masezerano, arimo kubika urugero rwa uranium rutagenwe , ibintu byateye kwifashisha inzira ya “snapback”—uburyo bwemewe bwo gusubizaho ibihano iyo hari uruhande rurenze ku masezerano.

Mu gihe Akanama ka Loni kari kagiye gutora kuri iki cyemezo, Irani yari yamaze kwamagana icyo cyemezo, ivuga ko ibihugu by’i Burayi bifite ubusumbane bwa politiki muri LONI kandi ko biri gukoresha nabi inzira yo gukemura amakimbirane.

Umunyamabanga wa Leta ushinzwe ububanyi n’amahanga muri Irani, Saeed Khatibzadeh, yavuze ko ibyo Abanyaburayi barimo gukora bishingiye kuri politiki y’igitugu, kandi ko bidakwiye.

Nyuma y’uko Leta Zunze Ubumwe za Amerika zikuye muri JCPOA mu 2018 ku butegetsi bwa Perezida Donald Trump, zihita zinongerera ibihano kuri Irani, ibi byatumye icyo gihugu gitangira kwigenga mu bikorwa bya nikleyeri, ndetse kirenga ku bipimo byemerewe mu masezerano.

Mu matora yabaye kuri uyu wa Gatanu saa yine za mu gitondo, icyemezo cyo gukomeza kurekura ibihano nticyabashije kubona amajwi icyenda akenewe ngo cyemerwe. Byari byitezwe ko Leta Zunze Ubumwe za Amerika izakivuguruza niramuka cyemejwe, ariko n’ubusanzwe cyari cyananiriwe kubona amajwi ahagije.

Ibi bivuze ko ibihano byari byakuweho mu 2015 bigomba gusubizwaho ku itariki ya 28 Nzeri 2025, nyuma y’iminsi 30 y’igenzura riteganywa na snapback.

Ibihugu nk’u Bushinwa, Uburusiya na Pakisitani byari byamaze gutangaza ko bishyigikiye icyemezo cyo kudasubizaho ibihano, mu gihe ibihugu nka Amerika, Ubwongereza, Ubufaransa, Denmark, Ubugereki, Panama, Slovenia n’u Koreya y’Epfo (ifite ubuyobozi bw’Akanama muri uku kwezi) byari byiteguye kukirwanya cyangwa kutagira uruhande bibogamiraho.