Ikipe y’Igihugu ya Ethiopia yemerewe kwakirira ikipe ya Guinée-Bissau kuri Stade Amahoro, mu mukino w’umunsi wa gatanu w’amatsinda yo gushaka itike y’Igikombe cy’Isi cya 2026. Uyu mukino uzaba tariki ya 7 Ukwakira 2025, ari na bwo hazaba hakinwa umunsi ubanziriza uwa nyuma mu Itsinda A.
Ibi byemejwe n’Impuzamashyirahamwe y’Umupira w’Amaguru muri Afurika [CAF], ubwo yasohoraga urutonde rw’ibihugu bitaruzuza ibisabwa kugira ngo byakire imikino mpuzamahanga. Ethiopia, kimwe n’ibindi bihugu, yabuze ikibuga cyujuje ibisabwa, bituma isaba gukinirwa hanze y’igihugu.
FERWAFA yemeje ko nta mpungenge zihari zo kuba uyu mukino wa Ethiopia wahurirana n’uwo u Rwanda ruzakiramo Bénin, kuko amatariki yatanzwe atabangikanye. Ni intambwe ikomeye ku Rwanda mu kugaragaza ubushobozi bwo kwakira imikino y’ibindi bihugu, ibintu byagiye bigaragara kenshi mu bihe bya vuba.
Muri uru rwego, Ethiopia irakomeza gukoresha u Rwanda nk’ahantu hizewe, dore ko no mu mikino ibiri iheruka, yayikiniye hanze, itsindwa na Misiri na Sierra Leone ku bitego 2-0. Kugeza ubu, Ethiopia iri ku mwanya wa gatandatu mu Itsinda A riyobowe na Misiri.
Si Ethiopia gusa yahisemo gukinira mu Rwanda. Muri Ugushyingo 2023, Zimbabwe yahakiriye Nigeria kuri Stade ya Huye.
Yongeye kuza no kwakira u Rwanda kuri Kigali Pelé Stadium mu mikino y’amajonjora y’Igikombe cy’Isi cy’abangavu batarengeje imyaka 20 yabaye muri Gicurasi 2025. Muri Nyakanga, Djibouti na yo yakiniye na Rwanda kuri Stade Amahoro mu gushaka itike ya CHAN 2024.
IZINDI NKURU WASOMA
