Kuri uyu wa Kabiri, tariki ya 23 Nzeri 2025, mu isiganwa rya Shampiyona y’Isi y’Amagare ririmo kubera mu Rwanda, Abaholandi babiri, Arens Megan mu bangavu na Michiel Mouris mu ngimbi, begukanye imidali ya Zahabu mu cyiciro cy’isiganwa ryo kwiruka n’ibihe (ITT).
Mu bakobwa batarengeje imyaka 19, Umuholandikazi Megan Arens yegukanye umwanya wa mbere akoresheje iminota 25 n’amasegonda 47 ku ntera y’ibilometero 18,3. Yakurikiwe na Paula Ostiz wo muri Espagne, warushijwe amasegonda 35, mu gihe Oda Aune Gissinger wo muri Norvège yabaye uwa gatatu, arushwa amasegonda 37.
U Rwanda rwari ruhagarariwe n’abakinnyi babiri mu cyiciro cy’abangavu: Masengesho Yvonne na Uwiringiyimana Liliane. Masengesho yabaye uwa 33 akoresheje iminota 29 n’amasegonda 43, mu gihe Uwiringiyimana yabaye uwa 40 mu bakinnyi 47, akoresheje iminota 30 n’amasegonda 58.
Mu cyiciro cy’ingimbi [abahungu bari munsi y’imyaka 19], Umuholandi Michiel Mouris na we yitwaye neza atsindira umudali wa Zahabu akoresheje iminota 29 n’amasegonda 7 ku ntera ya kilometero 22,6.
Abanyarwanda babiri, Byusa Pacifique na Ishimwe Brian, na bo bari mu basiganwe. Byusa ni we wahagurutse bwa mbere muri iki cyiciro, asoza isiganwa akoresheje iminota 34 n’amasegonda 34. Ishimwe Brian we yabaye uwa munani, aho yakoresheje iminota 34 n’amasegonda 59, arushwa n’uwatsinze iminota 5 n’amasegonda 27.
Kuri uyu wa Gatatu, tariki ya 24 Nzeri 2025, Shampiyona izakomeza n’isiganwa rihuza amakipe y’abagabo n’abagore (Team Time Trial – TTT), kuri kilometero 41,8.
IZINDI NKURU WASOMA
