Hamenyekanye andi makuru mashya kuri b’Abanyakenya bari bagiye kujyanwa kurwana ku ruhande rw’u Burusiya

Ambasade y’igihugu cy’Uburusiya i Nairobi  muri Kenya yahakanye amakuru yavugaga ko umuturage w’Uburusiya,  Mikhail Lyapin,  wakekwagaho gutwara Abanyakenya ku rwana mu ntambara y’u Burusiya na Ukraine  yaba  yatawe muri yombi  akanasubizwa iwabo igitaraganya.

Ibi  Ambasade  y’u Burusiya yabitangaje mu itangazo yasohoye muri iki Cyumweru dusoje  aho yemeza ko ayo ari amakuru adafite ishingiro rifatika ndetse banasobanura neza uko byagendekeye umuturage wabo wakekwagaho ibi byaha.

Yavuze ko uwo muturage  yajyanywe ku biro by’Urwego rw’Ubugenzacyaha rwa Kenya (DCI) i Nairobi kugira ngo atange ibisobanuro ku bikorwa bye by’ubucuruzi muri icyo gihugu. Nyuma yo kurangiza inzira zose zikenewe, ku mugoroba wo ku ya 26 Nzeri  2025, Bwana Lyapin, nk’uko yari  abifite muri gahunda, yasohotse muri Kenya.

Ambasaderi w’u Burusiya i Nairobi yongeyeho ko batanze  ubufasha bwa dipolomasi n’ubwa gisivili kuri uwo muturage  kandi ko nta burenganzira na bumwe bwe bwigeze buhutazwa. Cyakoze Ambasade y’u Burusiya yavuze ko  nta makuru ifite yemejwe n’inzego za Kenya ku birego biregwa Lyapin cyangwa ibikorwa bye kandi ko  Bwana Lyapin atigeze akorera inzego za Leta y’u Burusiya cyangwa se  Ambasade y’u Burusiya i Nairobi,”

Amakuru y’ibitangazamakuru byo muri Kenya yavugaga ko uyu muturage w’u Burusiya yatawe muri yombi ku mugoroba wo ku wa Kane, nyuma yo gusanga Abanyakenya 22 mu macumbi i Nairobi, bivugwa ko biteguraga kujya i Moscou kurwana kuruhande rw’u Burusiya mu ntambara bahanganyemo na Ukraine kuva muri Gashyantare ya 2022.

Ikinyamakuru BBC kiri mu byatangaje bwa mbere iyi nkuru cyatangaje ko abapolisi bafashe ibikoresho byo gushishikariza abantu kujya muri iyi gahunda,  inyandiko z’ingendo n’amabaruwa y’akazi ,  bata muri yombi ukomoka mu gihugu cy’Uburusiya.

Ku wa Gatanu, Edward Kamau Gituku, Umunyakenya ushinjwa kuyobora ihuriro ry’ubucuruzi bw’abantu mpuzamahanga, yafunzwe iminsi icumi kugira ngo abapolisi barangize iperereza.

Gusa nyuma Urukiko rwa Kahawa Law Courts rwategetse ko Edward Kamau Gituku aguma kuri Sitasiyo ya Polisi ya Muthaiga nyuma y’uko Ubushinjacyaha (ODPP) busabye ko akomeza gufungwa.

Nk’uko abashinzwe iperereza babivuga, Gituku akekwaho kuba ari we uyobora ihuriro mpuzamahanga ry’icuruzwa ry’abantu ryohereza Abanyakenya i Moscou mu Burusiya, aho bivugwa ko bahura n’ihohoterwa ndetse bakajyanwa mu ntambara.

Si ubwa mbere ibi bivuzwe ko Uburusiya bwaba bokoresha abaturage bavuye hiry no hino ku Isi mu guhangana na Ukraine gusa igiteye impungenge ni uko benshi mu bajyayo baba batazi ko aribyo bagiyemo bakisangayo nta yandi mahitabom bafite usibye kujya ku mirongo y’urugamba . kugeza ubu Uburusiya nta kintu buravugwa mu buryo burambuye ku birego nkibi.