Hamenyekanye ibihano byafatiwe Mamadou Sy na Dauda Yussif

APR FC yatangaje ko yahagaritse abakinnyi babiri bayo, Mamadou Sy na Dauda Yussif Seidu, mu gihe cy’iminsi 30 kubera imyitwarire mibi bagaragaje ubwo ikipe yari yagiye muri Misiri gukina umukino wo kwishyura wa CAF Champions League wabahuje na Pyramids FC.

Rutahizamu  ukomoka mu gihugu cya  Mauritania, Mamadou Sy, hamwe n’Umunya-Ghana ukina hagati,  Dauda Yussif Seidu, bombi ntibagaragaye muri uwo mukino wabereye i Cairo ku Cyumweru  tariki 5 Ukwakira 2025.

Mu itangazo ryasohowe  ku wa  Gatanu, tariki  10 Ukwakira 2025,  ubuyobozi bw’ikipe y’ingabo z’Igihugu   bwavuze ko hagaragaye imyitwarire itari myiza muri urwo rugendo, ari nayo mpamvu bwifuje gusobanurira abafana n’abakunzi b’ikipe iby’icyo kibazo.

Iryo tangazo rigira  riti: “Ubuyobozi bwa APR Football Club burashaka gusobanurira abo bireba bose, cyane cyane abafana n’abakunzi bacu b’akadasohoka, ibijyanye n’ikibazo cy’imyitwarire itari myiza cyagaragaye i Cairo, Misiri, mu mukino wa CAF Champions League wahuje APR FC na Pyramids FC.”

Ryakomeje rivuga ko mu gihe cyo kwitegura uwo mukino, abakinnyi babiri  Mamadou Sy  na Dauda Yussif  basuzuguye nkana amabwiriza n’amategeko y’umutoza mukuru n’ubuyobozi bw’ikipe.

Nyuma yo kuganira n’ababigizemo uruhare no gukurikiza amategeko agenga imyitwarire ndetse n’amasezerano y’abakinnyi, ubuyobozi bwafashe icyemezo cyo guhagarika abo bakinnyi bombi mu gihe cy’iminsi 30. Iki gihano kigamije gutanga umwanya wo gukora iperereza ryimbitse kandi ryigenga mbere yo gufata izindi ngamba.

Mu itangazo kandi, ubuyobozi bwa APR FC bwongeye gushimangira ko buharanira ubunyamwuga, imyitwarire myiza n’indangagaciro z’ikipe, kandi ko nta muntu n’umwe uri hejuru y’amahame ayiranga. Bwasabye buri mukinnyi kubahiriza amahame y’ubudahemuka, gukorera hamwe no kubahana.

Nyuma y’iyi mikino, Dauda Yussif yasubukuye imyitozo ku wa Gatatu, mu gihe Mamadou Sy we yagiye mu ikipe y’igihugu ya Mauritania mu gufasha igihugu cye mu gushaka itiki y’igikombe cy’Isi cya  2026 kizabera muri Amerika, Canada ndetse na Mexico.