Mikel Arteta yahawe amahirwe yo kongera kwikiranura na Enzo Maresca

Irushanwa rya Carabao Cup rigeze aho rukomeye cyane, aho amakipe ane asigaye yitegura imikino ya ½.

Nyuma ya tombola yabaye, byemejwe ko Newcastle United izacakirana na Manchester City, mu mukino utegerejwe na benshi bitewe n’ubukana aya makipe yombi afite muri iyi minsi.

Newcastle, ari na yo ifite igikombe giheruka, ikomeje kwandika amateka mashya. Mu kwezi kwa Werurwe gushize, yatsinze Liverpool itwara igikombe cya mbere cyo mu gihugu nyuma y’imyaka 70 yari ishize itabigeraho.

Ibyo byatumye abafana bayo bongera kwizera ko bashobora kongera kugera kure, nubwo bagiye guhura na Manchester City imaze kwegukana Carabao Cup inshuro umunani.

Manchester City yaryegukanye inshuro enye zikurikiranye mu 2021. Nubwo itari yongeye kugera muri ½ mu myaka ishize, iyi kipe ya Pep Guardiola iracyafite izina rikomeye n’abakinnyi bashobora guhindura umukino isaha iyo ari yo yose.

Ku rundi ruhande, Chelsea na yo irategereje kumenya uwo izahura na we hagati ya Arsenal na Crystal Palace. Aya makipe yombi yagombaga guhura muri ¼, ariko umukino wasubitswe kugira ngo Palace itaremererwa n’imikino myinshi mu minsi mike, bitewe n’uko yari ifite n’indi mikino mu irushanwa rya Europa Conference League.

Chelsea izamenya uwo izakina ku wa Kabiri tariki ya 23 Ukuboza. Iyi kipe yo mu burengerazuba bwa Londres ifite inyota yo kongera kwegukana iki gikombe iheruka gutwara mu 2015, nubwo yatsinzwe ku mukino wa nyuma na Liverpool mu 2022 no mu 2024.

Imikino ibanza ya ½ izakinwa mu cyumweru gitangira tariki ya 12 Mutarama 2026, naho iyo kwishyura ikazabera mu cyumweru gitangira tariki ya 2 Gashyantare.

Tombola yose

• Chelsea v Arsenal/Crystal Palace
• Newcastle v Manchester City