Congo: Kiliziya Gatolika yongeye gutanga impuruza

Mu gihe Repubulika ya Demokarasi ya Kongo (RDC) ikomeje guhura n’ikibazo cy’umutekano muke gihoraho kiyogoza igihugu, cyane cyane mu burasirazuba bwacyo bitewe n’ibikorwa by’imitwe yitwaje intwaro haba iy’imbere mu gihugu n’iy’amahanga,  Karidinali akaba n’Umushumba Mukuru wa Diyosezi Gatolika ya Kinshasa, Fridolin Ambongo, arasaba amahoro arambye yatuma igihugu gishobora gutsinda izi ngorane zibangamiye iterambere ryacyo.

Mu butumwa yatanze mu nyigisho ye ya Misa ya Noheli  muri Katederali ya Notre-Dame du Congo, mu rwego rwo kwizihiza ivuka rya Yezu Kristu, uyu muyobozi wa Kiliziya Gatolika yagaragaje ko ayo mahoro adashobora kugerwaho hatabayeho ukwihana kuvuye ku mutima, ubwiyunge nyakuri n’ubushake bukomeye bwo kwinjira mu biganiro bifatika kandi byubaka.

Karidinali Ambongo kandi yatanze ubutumire bwihutirwa busaba kubana mu mahoro no kubana neza hagati y’amoko n’imiryango itandukanye igize igihugu.

Mu rwego rw’umutekano urangwa n’uko inyeshyamba za AFC/M23  zikomeje kwigarurira ibice bitandukanye by’igihugu, Karidinali Fridolin Ambongo yongeye gushimangira  ko Amasezerano Mbanzirizamahoro (Social Pact for Peace) mu karere k’Ibiyaga Bigari akiri igisubizo gikwiye ku kibazo kimaze imyaka irenga 30 kiyogoza aka gace ka Afurika.

Nubwo amadini atandukanye yashyize ahagaragara igitekerezo-ngenderwaho (roadmap) kigamije ibiganiro bya politiki ku rwego rw’igihugu, mu rwego rwo gushyigikira inzira za dipolomasi mpuzamahanga ziyobowe na Leta Zunze Ubumwe za Amerika na Qatar, Umukuru w’Igihugu, Félix Tshisekedi, usabwa gufata ingamba za Leta zo gutumiza ibi biganiro, yakomeje guhagarara ku mwanzuro we: nta biganiro bishobora kuba biturutse ku wundi mutwe utari we.

Muri RDC, amadini menshi ubu ari kuvuga ijwi rimwe ku buryo bwo gukemura ikibazo cyo mu burasirazuba bw’igihugu, bavuga ko cyatewe n’ibyo bita igitero cy’u Rwanda binyuze mu nyeshyamba za AFC/M23.

Kuva icyo gitekerezo cyatangwa, ibikorwa byari bitegerejwe ku ruhande rw’Umukuru w’Igihugu byakomeje gutinda gushyirwa mu bikorwa. Ku rwego mpuzamahanga, inzira za dipolomasi ziri ku mpapuro gusa aho  zikugorwa no gutanga ibisubizo bifatika ku butaka, mu gihe umwuka mubi ukomeje hagati ya Kinshasa na Kigali, ndetse no hagati ya Kinshasa n’inyeshyamba za AFC/M23.