Borussia Dortmund yo mu Budage yatangaje ko yamaze gusinyisha umukinnyi w’ikipe y’igihugu y’u Bwongereza y’abatarengeje imyaka 21, Carney Chukwuemeka, imukuye muri Chelsea ku masezerano y’imyaka itanu.
Uyu musore w’imyaka 21 yakiniye Dortmund mu gice cya kabiri cy’umwaka ushize w’imikino nk’intizanyo, akaba ubu yayisinyiye burundu mu masezerano ashobora kugeza ku gaciro ka miliyoni 24 z’amapawundi.
Chukwuemeka, ukina hagati mu kibuga asatira izamu, yari yarageze muri Chelsea avuye muri Aston Villa mu mwaka 2022 ku kayabo ka miliyoni 20 z’amapawundi, aho yakiniye iyi kipe y’i Londres imikino 32.
Muri iyi nkubiri yo gusohora abakinnyi ikomeje kuba muri Chelsea, undi mukinnyi – myugariro Aaron Anselmino – nawe yamaze kwemera kwerekeza muri Dortmund mu ntizanyo y’umwaka umwe, ndetse yaramaze kugera mu Budage aho agomba gusoreza byose.
Ubusabe bwa UEFA ku bijyanye n’amategeko y’ubukungu bwasunikiye Chelsea kugira inyungu zaturutse igurishwa ry’abakinnyi muri iri soko ry’igura n’igurisha kugira ngo babashe kwemererwa kwandikisha abakinnyi bashya muri Champions League y’uyu mwaka.
Ubu Chelsea imaze kubona arenga miliyoni 270 z’amapawundi mu igurisha ry’abakinnyi, hafi kunganya n’ayo bamaze gukoresha ku bakinnyi bashya, angana na miliyoni 277.
Ibi byose bije nyuma y’uko iyi kipe iciwe amande ya miliyoni 26.7 z’amapawundi kubera kurenga ku mabwiriza ya UEFA arebana n’amategeko y’imari no kugira ikigereranyo kiri hejuru ya 80% cy’umushahara ugereranyijwe n’amafaranga binjiza.
Amakuru akomeje kuzenguruka avuga ko hari abandi bakinnyi bashobora kuva muri Chelsea mbere y’itariki ya nyuma y’iri soko , barimo Nicolas Jackson, Christopher Nkunku, Tyrique George, Raheem Sterling ndetse na Ben Chilwell.
Iyi kipe nayo ishobora kongera kugura abandi bakinnyi, aho amazina nka Alejandro Garnacho ukina muri Manchester United na Xavi Simons wa RB Leipzig akomeje kuvugwa nk’abashobora kwinjira.
IZINDI NKURU WASOMA
DRC : Abashatse guhirika Tshisekedi basabiwe gufungwa imyaka 15
