Mu gihe umutwe wa AFC/M23 ushimangira ko wasohotse mu mujyi wa Uvira, ingabo za Repubulika ya Demokarasi ya Congo (FARDC) barabihakana, bakavuga ko aba barwanyi bakiri mu mujyi kandi bagikora ibikorwa byabo.
Mu itangazo ryatanzwe kuri televiziyo y’igihugu, FARDC yashimangiye ko amakuru avuga ko AFC/M23 yavuye mu mujyi ari ibinyoma, rivuga ko hari ibikorwa bikomeje gukorerwa muri Uvira.
Byongeye, izi ngabo zamenyesheje ibihugu by’amahanga byagaragarijwe kuba abahuza mu biganiro by’amahoro birimo Leta Zunze Ubumwe za Amerika na Qatar ko ibyo ari “uburyarya bwa Leta y’u Rwanda.”
Ku rundi ruhande, ku itariki ya 19 Ukuboza 2025, Umudepite w’Inteko Ishinga Amategeko, Willy Mishiki, uyoboye inama y’ubutegetsi bw’umutwe wa Wazalendo, yavuze kuri Tele50 ko abasirikare be bamaze kugera i Uvira. Yavuze kandi ko Wazalendo bitegura ibikorwa ku butaka bw’u Rwanda, aho intego yabo ari “guhungabanya ubutegetsi bwa perezida Paul Kagame.”
Izi mvugo zinyuranye zatumye abaturage n’abashakashatsi mu by’umutekano bibaza ku biri kuba muri teritware ya Uvira, bikaba byateje impungenge ku mutekano w’abaturage ndetse no ku bikorwa by’amahoro bigamije kugarura ituze mu Burasirazuba bwa RDC.
Abahanga mu bya politiki n’umutekano bavuga ko ubu butumwa bushobora gutera imvururu nshya mu gihe nta nzira y’ukuri yo kuganira hagati y’impande zirebwa niri hurizo ry’amakimbirane ibonetse.
IZINDI NKURU WASOMA
Félix Tshisekedi yongeye kwitabaza igihugu cy’igituranyi
Menya imyaka Prophet Joshua ashobora gukatirwa
