Guinea: Amashyaka ya politike arimo n’irya Alpha Conde yahagaritswe by’agateganyo

Kuri uyu wa Gatandatu tariki ya 23 Kanama 2025, ubutegetsi bwa gisirikare muri Guinée bwatangaje icyemezo gikakaye cyo guhagarika by’agateganyo ibikorwa bya politiki by’amashyaka atatu akomeye mu gihugu, arimo n’iry’uwahoze ari Perezida, Alpha Condé.

Icyo cyemezo gifashwe mu gihe igihugu cyitegura amatora ya referandumu agomba guhindura Itegeko Nshinga risanzwe, ateganyijwe mu kwezi gutaha.

Amashyaka yahagaritswe ni Rassemblement du Peuple de Guinée (RPG) rya Condé, Union des Forces Démocratiques de Guinée (UFDG) riyobowe n’uwahoze ari Minisitiri w’Intebe Cellou Dalein Diallo, ndetse na Parti du Renouveau et du Progrès.

Ayo mashyaka ntayemerewe gukora ibikorwa bya politiki mu gihe cy’amezi atatu uhereye ako kanya. Mu itangazo ryasomewe kuri televiziyo y’igihugu, ubutegetsi buriho bwavuze ko ayo mashyaka yananiwe kuzuza inshingano yasabwaga.

Ibi bibaye mu gihe amashyirahamwe y’abaturage hamwe n’amashyaka ya opozisiyo bari bamaze gutegura imyigaragambyo yo kuva ku wa 5 Nzeri, bamagana ibyo bita “kwigarurira ubutegetsi ku mbaraga” bikozwe na Jenerali Mamady Doumbouya, wagiye ku butegetsi muri Nzeri 2021 ahiritse Condé.

Kuva icyo gihe, ubutegetsi bwa gisirikare bwakomeje gukumira imyigaragambyo, bwafunze ndetse bwirukana mu gihugu bamwe mu bayobozi b’imitwe ya politiki.

Amashyaka y’abatavuga rumwe na Leta  avuga ko iyo kamarampaka ari inzira yihishe yo kwemeza ko Doumbouya ashobora kwiyamamaza, n’ubwo “charte de transition” y’ubutegetsi bw’igisirikare yavugaga ko abayobozi babwo batemerewe kwiyamamaza.

Abasesenguzi mu bya politike batandukanye bemeza ko ibi bishobora guteza imyigaragambyo ikomeye mu gihugu, cyane ko abenegihugu benshi bari bamaze kugira icyizere gike ku bijyanye n’inzira y’inzibacyuho.