Komisiyo y’amatora muri Cameroon yemeje ko umukambwe Paul Biya ari we wongeye gutsinda amatora y’umukuru w’igihugu ku majwi ari hagati 53 na 54% nyuma y’imyaka 43 ari kubutegetsi.
Ibi bisobanuye ko ko uyu Perezida ukuze kurusha abandi ku Isi agomba gukomeza kuyobora kiriya gihugu cyo muri Afurika y’Iburengerazuba kugeza ku myaka 100 y’amavuko.
Paul Biya w’imyaka 92 yari ahanganye mu matora n’abanyapolitiki barimo Issa Tchiroma Bakary utavuga rumwe n’ubutegetsi bwe, ndetse ku wa 12 Ukwakira uyu yitangaje nk’uwatsinze amatora.
Komisiyo y’amatora igitangaza ko Paul Biya ari we watsinze Tchiroma yamaganiye kure iby’iyo ntsinzi, ashimangira ko ari we watsinze ku majwi abarirwa muri 60%.
Paul Biya ari ku butegetsi kuva mu mwaka 1982 bisobanuye ko iyi manda izasiga yujuje imyaka 50 ari ku butegesi n’imyaka izaba yamaze gukabakaba mu myaka 100.
Dore Abakuru b’Ibihugu 10 bamaze igihe kinini ku butegetsi muri Afurika mu mwaka wa 2025!
-
Teodoro Obiang Nguema Mbasogo – Guinea Equatorial: Ari ku butegetsi kuva muri Kanama 1979, akaba ari we mukuru w’igihugu umaze igihe kirekire ku butegetsi muri Afurika, amaze hafi imyaka 46 ayobora igihugu.
-
Paul Biya – Cameroun: Yagiye ku butegetsi mu Ugushyingo 1982, akaba amaze imyaka 43 ari Perezida wa Cameroun.
-
Denis Sassou Nguesso – Repubulika ya Kongo-Brazaville: Yayoboye bwa mbere kuva 1979 kugeza 1992, asubira ku butegetsi mu mwaka 1997 kugeza n’ubu akaba amaze hafi imyaka 41 ku butegetsi muri rusange.
-
Yoweri Kaguta Museveni – Uganda: Yafashe ubutegetsi muri Mutarama 1986 nyuma y’intambara ya gisirikare, akaba amaze imyaka 39 ayobora Uganda.
-
Isaias Afwerki – Eritrea: Yabaye perezida ubwo Eritrea yabonaga ubwigenge muri 1993, ubu amaze imyaka 32 ku butegetsi.
-
Umwami Mswati III – Eswatini (yahoze yitwa Swaziland): N’ubwo ari umwami aho kuba perezida, Mswati III amaze imyaka 39 ku ngoma kuva muri Mata 1986.
-
Ismaïl Omar Guelleh – Djibouti: Yagiye ku butegetsi muri Gicurasi 1999, akaba amaze imyaka 26 ayobora Djibouti.
-
Paul Kagame – Rwanda: Yabaye perezida mu mwaka 2000, ariko yari umwe mu bayobozi b’ingenzi mu butegetsi kuva nyuma ya jenoside yakorewe Abatutsi muri Mata 1994, Ubu amaze imyaka 25 ari Perezida w’u Rwanda.
-
Faure Gnassingbé – Togo: Yasimbuye se ku butegetsi mu mwaka 2005, akaba amaze imyaka 20 ari Perezida wa Togo.
-
Abdel Fattah el-Sisi – Misiri (Egypt): Yafashe ubutegetsi mu mwaka 2014 nyuma y’ihirikwa ry’ubutegetsi, akaba amaze imyaka 11 ayobora Misiri.
