Ikipe ya Wolves yirukanye umutoza wayo Vitor Pereira nyuma y’uko ananiwe gutsinda umukino na umwe mu mikino 10 ya shampiyona y’uyu mwaka w’imikino.
Amakuru dukesha umunyamakuru Ben Jacobs wa TalkSports, avuga ko uyu mwanzuro wafashwe nyuma y’intsinzwi y’ibitego 3-0 batsinzwemo na Fulham ku wa Gatandatu muri Premier League.
The Drum twanamenye ko uyu munya-Portigal yeretswe imiryango nta amezi abiri aciyeho nyuma y’uko yari asinye amasezerano mashya y’imyaka itatu n’ikipe.
Muri uyu mwaka, Pereira ntiyari yagatsinze umukino n’umwe, anganya imikino ibiri, atsindwa umunani, Wolves ifite ibitego birindwi yatsinze gusa mu gihe yatsinzwe ibitego 22.
Ikipe ni yo yonyine muri Premier League itaratsinda umukino n’umwe muri uyu mwaka, kuri ubu iri kurushwa amanota 8 na Burnley iri ku mwanya wa 17.
Nyuma y’umukino wa Fulham hari itsinda ry’abafana ryumvikanye rimuririmbira amagambo y’uko yari buze kumwirukana mu gitondo, mbere y’uko Perezida w’iyi kipe Jeff Shi amumenyesha icyemezo kuri iki Cyumweru tariki ya 2 Ugushyingo 2025.
Uyu mutoza w’Umuporutugali yari mu bahataniraga igihembo ku mwanya w’umutoza witwaye neza mu mwaka ushize nyuma yo gukiza Wolves kumanuka mu cyiciro cya kabiri.
Uyu mutoza ni we wa kane muri shampiyona y’uyu mwaka wirukanwe .
