Tottenham Hotspur yatangaje ko yasinyishije umukinnyi w’Umuholandi, Xavi Simons, ukina mu kibuga hagati, wari asanzwe akinira ikipe ya RB Leipzig.
Igikorwa cyo kumusinyisha cyatwaye akayabo k’agera kuri miliyoni 52 z’amapawundi [£52m], ahwanye na miliyoni €60.
Simons yari mu biganiro n’itsinda rya Chelsea rishinzwe kuyishakira abakinnyi , ariko yaje guhitamo kwerekeza muri Tottenham, ikipe yegukanye igikombe cya Europa League umwaka ushize.
Amakuru avuga ko ikipe ya Chelsea yari imaze kugirana ibiganiro na Simons ariko ntiyagize icyo yongeraho ku biganiro, ahubwo yo yahise yikomereza ibyo kugerageza kumanura igiciro cy’amasezerano ya Alejandro Garnacho yaraye isinyishije kuri miliyoni 40 z’amapawundi.
Ku myaka 22, Xavi Simons agiye muri Tottenham nk’umukinnyi ushinzwe gufasha ikipe mu kubona ibitego, nyuma yo kugerageza kugura abandi bakinnyi nka Morgan Gibbs-White na Eberechi Eze ariko bikanga.
Uyu mukinnyi yakoze imyaka itatu myiza muri Leipzig nyuma yo gutizwa na Paris Saint-Germain, aho yari yaragiye gukina ku ntizanyo.
Simons yavuze ko yishimye cyane kugera muri Tottenham, ashimangira ko yifuzaga kugaruka mu ikipe itwara ibikombe nyuma yo kugirana ibiganiro n’umutoza w’ikipe ya Spurs ,Thomas Frank .
Xavi Simons wamaze kugera muri Tottenham, akurikiye abandi bakinnyi bashya batandatu baje mu isoko ry’igura n’igurisha, barimo Mohammed Kudus, na Joao Palhinha.
Uyu mukinnyi amaze gukina imikino 78 muri Leipzig, yatsinze ibitego 22 ndetse atanga imipira yavuyemo ibitego isaga 22 ku bandi bakinnyi.
