Umukinnyi wo hagati w’ikipe ya Napoli n’Ikipe y’Igihugu ya Scotland, Scott McTominay, ari mu bakinnyi 30 bazahatana ku gihembo cy’umukinnyi w’umwaka ku Isi, Ballon d’Or 2025.
Ni ubwa mbere umukinnyi ukomoka mu bwami bw’Abongereza muri Scotland agaragara kuri uru rutonde kuva uwitwa Ally McCoist abikoze mu 1987.
Uyu mukinnyi w’imyaka 28, wahoze akinira Manchester United, yavuye muri iyo kipe mu kwezi ku kwakira 2024 mu igurishwa ryatwaye akayabo k’amapawundi miliyoni 25, yerekeza muri Napoli aho yahise agira uruhare rukomeye mu gutuma iyi kipe yegukana igikombe cya shampiyona y’u Butaliyani (Serie A).
Mu mikino 34 yakinnyemo muri shampiyona, McTominay yatsinze ibitego 12 anatorwa nk’umukinnyi w’umwaka muri Serie A.
Uru rutonde rw’abahataniye Ballon d’Or rugizwe n’abakinnyi bakomeye barimo Ousmane Dembélé wa Paris Saint-Germain, ufatwa nk’uzahangana cyane ku gikombe nyuma yo gufasha ikipe ye kwegukana Champions League i Munich. Abandi barimo Erling Haaland wa Manchester City, Mohamed Salah wa Liverpool, Lamine Yamal w’imyaka 18 ukinira Barcelona, ndetse na Jude Bellingham wa Real Madrid.
Biteganyijwe ko Ballon d’Or izatangwa ku wa 22 Nzeri 2025 mu birori bizabera i Paris.
McTominay yanditse amateka mashya nk’umukinnyi wa mbere w’Umwongereza wo muri Scotland ugarutse kuri uru rutonde mu myaka isaga 35.
IZINDI NKURU WASOMA
