Ku wa Mbere, tariki ya 22 Nzeri 2025, umunya-Suède Jakob Söderqvist ni we wigaranzuye abandi mu gusiganwa n’ibihe (ITT) mu cyiciro cy’abahungu batarengeje imyaka 23, atwara umudali wa Zahabu muri Shampiyona y’Isi y’Amagare iri kubera i Kigali ku nshuro yayo ya 98.
Uyu musore w’imyaka 22 yagaragaje ubuhanga buhanitse, akoresha iminota 38 n’amasegonda 24 mu rugendo rurerure rw’ibilometero 31,2, rwanyuze mu mihanda irimo BK Arena, Sonatube, Gahanga na KCC. Söderqvist yari aherutse kwegukana umwanya wa kabiri mu irushanwa ryabereye mu 2024, none i Kigali yahakuye ishema n’umudali w’icyubahiro.
Yakurikiwe na Nate Pingle wo muri Nouvelle-Zélande warushijwe umunota n’amasegonda atatu, naho Umufaransa Maxime Decomble aza ku mwanya wa gatatu arushwa umunota n’amasegonda ane.
U Rwanda rwari ruhagarariwe na Tuyizere Etienne na Niyonkuru Samuel. Tuyizere, umaze kwitabira Shampiyona y’Isi inshuro nyinshi harimo i Glasgow n’i Zurich, ni we wabimburiye abandi mu basiganwa. Yashoje ku mwanya wa 30 akoresheje iminota 43 n’amasegonda 36. Niyonkuru we yaje ku mwanya wa 28, akoresheje iminota 43 n’amasegonda 15.
Iyi ni inshuro ya mbere Shampiyona y’Isi y’Amagare ibereye kuri Afurika, bikaba byarushijeho kugaragaza akamaro k’uyu mukino mu rwego mpuzamahanga.
Kuri uyu wa Kabiri, tariki 23 Nzeri 2025, harakomeza umunsi wa gatatu w’irushanwa, aho hazasiganwa ingimbi n’abangavu batarengeje imyaka 19. Abakobwa bazasiganwa ku ntera ya kilometero 18,3 guhera saa 10:45, naho abahungu bakore ibilometero 22,6 guhera saa 14:00.
IZINDI NKURU WASOMA
